Bakıda Xəzərin hüquqi statusu üzrə işçi qrupunun görüşü keçirilir

Bu gün Bakıda Xəzərin hüquqi statusunun müəyyənləşdirilməsi üzrə işçi qrupunun nazir müavinləri səviyyəsində 33-cü görüşü başlayıb. Turan-ın müxbirinin  məlumatına görə, görüşdə Xəzərin statusuna dair Konvensiya layihəsi müzakirə olunacaq.

Görüş iki gün davam edəcək.

Azərbaycanı xarici işlər nazirinin müavini Xələf Xələfov, Rusiyanı ölkə prezidentinin demarkasiya və delimitasiya üzrə xüsusi nümayəndəsi İqor Bratçikov, Qazaxıstanı xarici işlər nazirinin müavini Kayrat Sarıbay, İranı xarici işlər nazirinin hüquqi və beynəlxalq məsələlər üzrə müavini Məhəmməd Mehdi Axundzadə, Türkmənistanı isə prezident yanında Xəzər məsələləri üzrə dövlət müəssisəsinin sədri Murad Atacanov təmsil edir. 

Qeyd edək ki, bu mövzuya dair danışıqlar uzun illərdir aparılır. Azərbaycan, Qazaxıstan və Rusiya öz mövqelərini razılaşdırıblar. Bu ölkələr dənizin dibinin modifikasiya edilən orta xətt üzrə bölünməsi, dənizin səthinin isə ümumi istifadə olunması barədə razılığa gəliblər. 

İran dəniz səthinin 20%-nin verilməsini tələb edir. Türkmənistan orta xəttin müəyyən olunması ilə bağlı Azərbaycanla razılığa gələ bilmir. Bu səbəbdən iki ölkə Xəzərdəki mübahisəli neft və qaz yataqlarını bölə  bilmir.-16/03D-