Barak Obama Respublika Günü münasibətilə Azərbaycan xalqını təbrik edib

ABŞ prezidenti Barak Obama Azərbaycanı Müstəqillik Günü münasibətilə təbrik edib.

“1918-ci il mayın 28-də müstəqil Azərbaycan müsəlman dünyasında ilk demokratik və dünyəvi respublika kimi beynəlxalq ictimaiyyətə nümunə oldu. Azərbaycanın əlamətdar tarixi ilə bağlı bayrama biz də qoşuluruq”, - B.Obama Azərbaycan prezidenti İlham Əliyevə ünvanladığı məktubda bildirib.

“Ölkələrimiz arasında, xüsusilə də enerji və regional təhlükəsizlik sahələrində möhkəm tərəfdaşlıq mövcuddur. ABŞ həmçinin davamlı, çiçəklənən demokratik cəmiyyətin qurulmasında və Dağlıq Qarabağ münaqişəsinin sülh yolu ilə həllində Azərbaycanın səylərinə kömək etməyə tam sadiqdir. Əfqanıstandakı kollektiv səylərimizin dəstəklənməsinə Azərbaycanın töhfələrini olduqca yüksək qiymətləndiririk.

  Milli bayramınız münasibətilə sizə və Azərbaycan xalqına Amerika xalqı adından ən xoş arzularımı çatdırıram", - məktubda deyilir.

ABŞ dövlət katibi Con Kerri də Azərbaycan xalqını təbrik edib. O deyib ki, Birləşmiş Ştatlar və Azərbaycan arasında dinamik tərəfdaşlıq münasibətləri var, ABŞ ölkənin müstəqilliyinin, onun demokratik institutlarının möhkəmləndirilməsinə və iqtisadi islahatların keçirilməsinə yardım göstərməkdə əzmlidir.

Əfqanıstanda beynəlxalq koalisiyada iştirakına görə Azərbaycana təşəkkürünü bildirən C.Kerri əmin olduğunu bildirib ki, birgə səylərlə “Cənub dəhlizi” adlanan boru kəməri üzərində işin başa çatacağı mühüm məqam gələcək”. “Biz bu xüsusi gündə sizinlə birlikdə daha stabil və çiçəklənən dünya qurmağa hazır olduğumuzu  bəyan edirik”, - ABŞ dövlət  katibi vurğulayıb.

Bayram münasibətilə Azərbaycanın ABŞ-dakı səfirliyi mayın 23-də rəsmi qəbul təşkil edib.—0--