Belçikanın xarici işlər naziri: "Biz istəyirik ki, Laçın dəhlizində heç bir məhdudiyyət olmasın"

Bakı/24.08.23/Turan: Avqustun 24-də Bakıda Azərbaycan və Belçikanın xarici işlər nazirləri - Ceyhun Bayramov və Hadja Lahbib arasında danışıqlar zamanı digərləri ilə yanaşı Zəngəzur dəhlizinin açılması məsələsi də müzakirə olunub.

Bunu Bayramov yekun mətbuat konfransında bildirib.

Danışıqlar zamanı orta Şərq-Qərb dəhlizinin rolu və bu qlobal layihənin yeni qolu kimi Zəngəzur dəhlizinin əhəmiyyəti qeyd edilib.

O xatırladıb ki, Azərbaycanla onun Naxçıvan muxtariyyəti arasında nəqliyyat kommunikasiyalarının açılması Ermənistanın 10 noyabr 2020-ci il tarixli Üçtərəfli Bəyanat çərçivəsində üzərinə götürdüyü öhdəliklərdən biridir.

“Bu məsələdə müəyyən irəliləyiş olsa da, Ermənistanın mövqeyinə görə 2,5 il ərzində tam nəticə əldə etmək mümkün olmayıb”, - deyə Bayramov bildirib.

Ümumiyyətlə, sülh sazişinin əldə olunması üçün beynəlxalq hüququn norma və prinsiplərinə uyğun olaraq Azərbaycan ərazilərinin işğalına son qoymaq, ölkələrin ərazi bütövlüyü və suverenliyinə təkcə sözdə və bəyanatda deyil, həm də real əməllərdə qarşılıqlı şəkildə hörmət etmək lazımdır. 

Öz növbəsində, belçikalı nazir qeyd edib ki, onun regiona səfərinin səbəblərindən biri “Qarabağ bölgəsindəki gərginlik”dir.

Azərbaycanın “Ermənistanla sülh əldə etmək üçün” böyük səylərini qeyd edən Lahbib qeyd edib ki, İrəvanda o, Ermənistanın xarici işlər nazirinə də deyib ki, “indi uzunmüddətli sülhə nail olmaq üçün tarixi fürsət yaranıb".

“Əlbəttə, Azərbaycanın ərazi bütövlüyünə hörmət edilməlidir. Hər iki ölkənin başçıları da ərazi bütövlüyü və suverenliyinə hörmətin vacibliyini bəyan ediblər. Səmimiyyət və cəsarət vacibdir. Biz əməkdaşlığı davam etdirməliyik”, - nazir bildirib.

“Biz istəyirik ki, Laçın dəhlizində heç bir məhdudiyyət olmasın, bu fayda vermir, imkanları məhdudlaşdırır. Biz bu məsələnin həllini istəyirik. İnanırıq ki, Azərbaycan bu məsələni məsuliyyətlə həll edə bilər”, - deyə Lahbib bildirib.

Bayramov öz növbəsində qeyd edib ki, Ermənistanın humanitar yüklərin daşınması üçün Azərbaycanın təklif etdiyi marşrutlardan imtina etməsi məsələni siyasiləşdirir.

Humanitar yardımı yalnız bir marşrutla qəbul etmək, digər alternativ yollardan imtina etmək məsələni siyasiləşdirmək deməkdir. Ermənistan məhz bunu edir”. 06В