Bələdiyə seçkilərlə bağlı Mövqe Sənədi yayılıb

Bakı/07.10.19/Turan: Seçkilərin Monitorinqi və Demokratiyanın Tədrisi Mərkəzinin (SMDT) 27 dekabr 2019-cu ildə keçiriləcək bələdiyyə seçkilərinə hazırlıq və seçki öncəsi ictimai-siyasi mühit ilə bağlı Mövqe Sənədi hazırlayıb.

Sənəd müəlliflərin fikrincə, qüvvədə olan Seçki Məcəlləsinin bəzi müddəaları həm yerli ictimai-siyasi təşkilatlar, həm də Avropa Şurasının Venesiya Komissiyası və ATƏT/DTİHB tərəfindən dəfələrlə tənqid edilsə də, çatışmazlıqları aradan qaldırmaq üçün zəruri islahatlar həyata

keçirilməyib. "SMDT-nin apardığı araşdırma göstərir ki, seçki komissiyalarının formalaşma strukturu, seçki hüququnun müdafiəsi üçün səmərəli hüquq müdafiə vasitələrinin yaradılması, seçki prosesinə qanunsuz müdaxilə hallarının qarşısının alınması, namizədlərin qeydiyyatı qaydaları və seçici siyahılarındakı ziddiyyətlərin aradan qaldırılması yönündə təkmilləşmələrə ehtiyac var".

Təşkilat seçki öncəsi bəzi jurnalistlərin ölkədən çıxışına qadağaların götürülməsini təqdir edir, lakin qeyd edir ki, hazırda 5 nəfər jurnalist olmaqla 112 nəfər fərqli fikir və mülahizələrinə, tənqidi və alternativ mövqeyinə görə siyasi motivlərlə həbsdədir. "Eyni zamanda hazırda 20-dən artıq veb səhifəyə, o cümlədən "Azadlıq" qəzeti, "Azadlıq" radiosu, Meydan TV kimi tənqidçi media qurumlarının veb səhifələrinə ölkə daxilində girişin bloklanması nəticəsində seçki öncəsi ifadə azadlığı kəskin şəkildə məhdudlaşıb".

SMDT müxalif siyasi partiya üzvlərinə qarşı açılan çoxsaylı cinayət və inzibati işlər nəticəsində siyasi fəalların vaxtaşırı həbs və təqib edildiyini qeyd edərək, bununla müxalif siyasi partiya üzvlərinin bələdiyyə seçkilərində namizəd kimi iştirak imkanlarının çətinləşdiyini deyir.

Sənəddə təşkilat son illər sərbəst toplaşmaq azadlığının təmin olunmasına məhdudiyyətlərin artmasını qeyd edir.

Sənəddə əlavə olunur ki, seçicilərin qeydiyyatı yönündə mövcud mexanizm təkmilləşməyib və səsvermə hüququ olan şəxslərlə bağlı Mərkəzi Seçki Komissiyasının rəsmi məlumatı ilə Dövlət Statistika Komitəsinin demoqrafik göstəriciləri arasında uyğunsuzluğa aydınlıq gətirilməyib. "SMDT hesab edir ki, 27 dekabr 2019-cu il bələdiyyə seçkilərinin azad, ədalətli və rəqabətli şəraitdə keçməsi üçün müstəqil və müxalif partiyaları təmsil edən namizədlərin qeydiyyatına müdaxilələr baş verməməlidir. Həmçinin sərbəst toplaşmaq azadlığına məhdudiyyətlər aradan qaldırılmalı, namizədlərin seçicilərlə görüşləri və mitinqləri üçün zəruri şərait təmin edilməli, ölkə televiziyalarında müxalif fikrə qadağalar götürülməlidir. SMDT seçki zamanı pozuntulara toxunaraq, qeyd edir ki seçki pozuntuları ilə bağlı mümkün şikayətlərin səmərəli araşdırılması üçün məhkəmələrə müdaxilə hallarının qarşısı alınmalı və bu şikayətlərə baxarkən məhkəmələr tərəfindən Avropa İnsan Hüquqları Məhkəməsinin seçki pozuntuları ilə bağlı qəbul etdiyi qərarlara istinad edilməlidir.

SMDT 1 dekabr 2008-ci ildə qeydiyyatı ləğv edilmiş Seçki Monitorinq

Mərkəzinin (SMM) əsasında təsis olunub. Xatırladaq ki, 14 may 2008-ci ildə SMM-in qeydiyyatı Ədliyyə Nazirliyinin qanunsuz iddiası əsasında Xətai Rayon Məhkəməsi tərəfindən ləğv edilib.

SMDT (keçmiş SMM) 2001-ci ildən Azərbaycanda keçirilən 15 seçkinin monitorinqini həyata keçirib. Seçkilərin monitorinqi ilə bağlı SMDT indiyədək 14000 nəfərdən artıq vətəndaşa 600-

dən çox təlim keçib və onların seçki komissiyalarında akkreditə olunmalarına hüquqi-texniki yardım göstərib. SMDT ATƏT-ə üzv olan ölkələrin QHT-lərini birləşdirən Seçkilərin Monitorinqi

Təşkilatlarının Avropa Şəbəkəsinin (ENEMO), Şərq Tərəfdaşlıq ölkələri Vətəndaş Cəmiyyəti

Forumu, Demokratik Seçkilər üzrə Avropa Platformasının (EPDE) və Yerli Seçki Müşahidəçilərinin Qlobal Şəbəkəsinin üzvüdür.

Təşkilatın sədri tanınmış hüquq müdafiəçisi Anar Məmmədlidir.-21С--