Sergey Markov: �Rusiya Azərbaycanın Qarabağ uğrunda döyüşməsinin əleyhinə deyil�

Bakı/07.10.19/Turan: Rusiya Azərbaycana Qarabağ uğrunda döyüşməyi və RF-dan alınan silahlardan istifadəni qadağan etmir. Bundan əlavə, prezident Vladimir Putin dəfələrlə deyib ki, KTMT Ermənistanın ərazi bütövlüyünü qorumaqda səlahiyyətlidir və Dağlıq Qarabağda silahlı münaqişədə iştirak etmək niyyətində deyil. Ancaq prezident Əliyev bilir ki, müharibə uzana bilər və böyük insan tələfatına səbəb olar. Ona görə də problemi danışıqlar yolu ilə həll etməyə üstünlük verməkdə haqlıdır. Bu barədə Turan-a müsahibəsində Qeyri-Kommersiya Tərəfdaşlığı Siyasi Araşdırmalar İnstitutunun baş direktoru, RF Dövlət Dumasının deputatı, RF İctimai Palatasının üzvü Sergey Markov Turan agentliyinə müsahbəsində deyib. "Rusiya tərəfindən heç bir qadağa yoxdur", - o əlavə edib.

Azərbaycanın Rusiya silahları almasını şərh edən rusiyalı politoloq deyib ki, "Azərbaycanın böyük silah potensialının olması Ermənistanın Qarabağ probleminin sülh yolu ilə həllinə razılıq verməsi üçün yaxşı motivdir".

S.Markov Bakıdadır və oktyabrın 7-də mətbuat konfransı keçirib.

"Ermənistanın baş naziri Nikol Paşinyan Ermənistanı blokadadan çıxarmaq istəyir. Qarabağ probleminin həllinə dair Kazan planı (blokadanın qaldırılması, Azərbaycanla iqtisadi əlaqələrin başlanması, Qarabağ ətrafındakı yeddi rayonun qaytarılması müqabilində ona müvəqqəti statusun verilməsi - red.) ilə razılaşmağa hazırdır. Lakin Paşinyan radikal erməni qruplaşmalarından qorxur. Belə ki, 1999-cu ildə Ermənistan parlamentində etdikləri kimi, onu partlada, güllələyə bilərlər, ya polis bölməsini (Sasna Tsrer qrupu - red.) ələ keçirə bilərlər.

Paşinyan erməni əsilli Livan və Suriya döyüşçülərindən qorxur. Buna görə də Qarabağ probleminin həllini Qarabağ rəhbərliyinin üzərinə qoyur. Orada gələn il prezident seçkiləri keçiriləcək, orada sabit hakimiyyətin qurulmasını gözləmək lazımdır, amma Azərbaycan gözləməkdən yorulub", -Markov deyib.

O hesab edir ki, Moskva Paşinyana təzyiq göstərir, Qarabağla bağlı qeyri-müəyyənliyi tezliklə bitirməyi tələb edir. "Moskvada Azərbaycanın səbrini yüksək qiymətləndirirlər", - o deyib.

Paşinyan qərbyönlü siyasətçi kimi formalaşıb, ancaq hakmiyyətdə olarkən başa düşdü ki, Ermənistan Qərblə münasibətlərini Rusiya ilə münasibətləri korlamadan yaxşılaşdırmalıdır. Bu mənada deyə bilərik ki, Paşinyan Qərb və Rusiya ilə eyni dərəcədə faydalı münasibətlər quran Azərbaycan fenomenini təkrarlamaq istəyir", - Markov bildirib.

Politoloq Rusiya KİV-də erməni lobbisinin gücünü etiraf edib. O, tanınmış adları sadalayıb: Mitrofanov, Simonyan, Bağdasarov, Kurginyan, Balayan, Şahnazarov və başqaları. Onlar Rusiya ictimaiyyətinin Azərbaycanın mövqeyini dinləməsinə imkan vermirlər. Digər tərəfdən, Qarabağ məsələsi Rusiyada geniş kütlələr arasında maraqlı deyil. Markov Moskva KİV-ə Azərbaycanın təsirinin olmamasında Bakını ittiham edib. Belə ki, Bakı bu istiqamətdə fəal iş aparmalıdır, o əlavə edib.-0-