Beynəlxalq Münasibətlərin Təhlili Mərkəzinin Ermənistan ordusunda muzdlulara dair hesabatı

Bakı/04.12.20/Turan: İkinci Qarabağ Müharibəsi günlərində (27 sentyabr - 9 noyabr 2020-ci il) erməni və digər siyasətçilər və KİV Qarabağda Azərbaycan tərəfində döyüşən "minlərlə suriyalı, türk və digər muzdlular" haqda məlumat yayıblar. "Yerləşmə marşrutları", "terrorçuların sayı" haqda saxta fotoşəkillər və mətnlər dərc edilib. 44 gündən sonra -erməni ordusunun darmadağın edildiyi vaxtda bəzi parlamentlər və beynəlxalq təşkilatlar Azərbaycanı "terrorçuları çıxarmağa" çağırıblar.

Bununla yanaşı, Fransa parlamentariləri, rusiyalı jurnalistlər və digər "Ermənistanın digər dostları" Ermənistan hökumətinin, baş nazirinin əcnəbiləri dəfələrlə Qarabağ cəbhəsinə getməyə çağırması haqda danışmırlar. Yerevanda iddia edirlər ki, Qarabağda könüllü döyüşən erməni əsilli əcnəbilər muzdlu deyil.

Azərbaycan Beynəlxalq Münasibətlərin Təhlili Mərkəzi (CAİR) analitik hesabat hazırlayıb. Sənəddə Qarabağ müharibəsində əcnəbilərin Ermənistanın tərəfində kütləvi döyüşməsinin rəsmi faktlarla təsdiqinə dair məlumatlar yer alıb.  

"Ermənistanın Azərbaycana qarşı muzdlu və əcnəbi yaraqlılardan istifadə etməsi" adlı hesabatda bu cür hərəkətləri tənzimləyən hüquqi baza qiymətləndirilib.

Azərbaycana qarşı müharibədə əcnəbi muzdlulardan istifadə birinci Qarabağ müharibəsi (1988-94-cü illər) zamanı da fəal tətbiq olunmuşdu. Ən bariz nümunə ondan ibarətdir ki, Kaliforniyada yaşayan beynəlxalq terrorçu Monte Melkonyan Qarabağda qətlə yetirilib, Ermənistanın Milli Qəhrəmanı adına layiq görülüb.

Əcnəbilərin özgə müharibələrdə iştirakını müəyyən edən və pisləyən bir neçə beynəlxalq akt məlumdur. 1949-cu il Cenevrə Konvensiyasına 1977-ci il tarixli Əlavə  Protokolun 47-ci maddəsinə əsasən, muzdlu müharibə üçün ələ alınmış əcnəbidir, əsasən şəxsi mənfəət qazanmaq istəyini  əldə rəhbər tutur. Yəni, xarici ermənilərin Qarabağ müharibəsinə maddi mükafat olmadan cəlb edilməsi muzdluluq ittihamını istisna etmir.

Muzdluların cəlb edilməsi, istifadəsi, maliyyələşdirilməsi və təlimi ilə mübarizə haqqında 1989-cu il Beynəlxalq Konvensiyasında deyilir ki, muzdluları cəlb etmək, istifadə etmək, maliyyələşdirmək və ya öyrətmək olmaz.

BMT Təhlükəsizlik Şurası terror aktlarının törədilməsi, planlaşdırılması, hazırlanması və ya törədilməsində iştirak, terrorçuların hazırlanması və ya silahlı münaqişə ilə əlaqədar belə hazırlığın keçirilməsi məqsədilə "yaşadıqları və ya vətəndaşlıqları olmayan dövlətə gedən şəxslər" kimi müəyyən edilmiş əcnəbi yaraqlı-terrorçular üçün normativ baza olan 2178 (2014) saylı qətnamə qəbul edib.

4 dekabr 1997-ci ildə Azərbaycan Konvensiyanı ratifikasiya edərək onun iştirakçısı olub. 27 oktyabr 2020-ci il tarixində Ermənistan Milli Məclisi də bu Konvensiyanı ratifikasiya edib.

Azərbaycan prezidenti İlham Əliyev qeyd edib ki, Ermənistan əcnəbi muzdlulardan aktiv istifadə edib və bunun təsdiqi kimi Azərbaycanda çoxsaylı foto və videosənədlər, həmçinin xarici vətəndaşların, əsasən Fransa, ABŞ, Livan, Kanada, Gürcüstan və digər ölkələrin vətəndaşlarının pasportları var. "Bu vətəndaşların bir qismi erməni əsillidir, bir qismi isə yox. Lakin bu, məsələnin mahiyyətini dəyişmir".

Azərbaycan hüquq-mühafizə orqanlarının məlumatına görə, Avstraliya, Belarus, Belçika, Braziliya, Kanada, Kipr, Danimarka, Misir, Fransa, Yunanıstan, Hindistan, İordaniya, Livan, Meksika, Rusiya Federasiyası, İspaniya, İsveç, Ukrayna və ABŞ vətəndaşları Qarabağda müharibədə iştirak etmək üçün Ermənistanda təlim keçiblər.

Sentyabrın 28-də "Rusiya Erməniləri İttifaqı"nın prezidenti Ara Abramyan bəyan edib ki, 20 000 nəfər Rusiya ermənisi Ermənistana gedərək Azərbaycanın işğal olunmuş ərazilərində döyüşmək niyyətindədir.

Sentyabrın 29-da Rusiya erməniləri, o cümlədən Erməni İnqilabi Federasiyası (EİF) Daşnaksütyun Partiyasının bəzi üzvləri hərbi əməliyyatlarda könüllü olaraq iştirak etmək üçün Soçidən Yerevana gediblər.

Sentyabrın 30-da Gürcüstanın Samtsxe-Cavaxetiya regionundan 8000 erməni könüllü olaraq müharibədə iştirak etmək üçün erməni diasporu tərəfindən toplanmış 120 ton humanitar yardımla birlikdə Ermənistana gedib.

İran vətəndaşlarının Azərbaycana qarşı müharibəyə cəlb edilməsi faktları var.

"Greek City Times" 28 il öncə Yunanıstana köçmüş erməni əsilli yunan vətəndaşların müharibədə iştirakını işıqlandırıb. Adının açıqlanmasını istəməyən, lakin vəziyyət haqda yaxşı məlumatlı olan mənbə bildirib ki,  Azərbaycanın beynəlxalq aləmdə tanınmış ərazilərində döyüşə getməyə hazır olan "30-35 erməni-yunanı" və daha "15-20 etnik yunanı" şəxsən tanıyır.

"France 24" və "Novaya qazeta"nın məlumatına görə, Fransa vətəndaşlığı olan bir neçə nəfər Azərbaycana qarşı hərbi əməliyyatlarda fəal iştirak edib.

Azərbaycanın baş prokuroru Kamran Əliyev 30 oktyabr 2020-ci ildə keçirdiyi brifinqdə bildirib ki, müharibədə Ermənistan SQ tərəfində iştirak edən əcnəbilər arasında Fransa, ABŞ, Yunanıstan, Gürcüstan, Livan, Suriya, Belarus və s. ölkələrin vətəndaşları olub.

Bu faktlarla bağlı Azərbaycan CM-in müvafiq maddələri ilə cinayət işləri başlanıb, sadalanan ölkələrə qarşılıqlı hüquqi yardım sahəsində müqavilələr çərçivəsində sorğular göndərilib.

Ermənistan və onun diasporu Azərbaycanın ərazi bütövlüyünü pozmaq məqsədilə həm yerli səviyyədə, həm də xaricdə muzdluların və əcnəbi yaraqlıların cəlb edilməsi, istifadə olunması, maliyyələşdirilməsi və təlimi prosesinə cəlb ediliblər. Bu, beynəlxalq humanitar hüququn şəkildə pozulması, insan hüquqlarının və qaçqınların beynəlxalq hüququnun kobud pozulmasıdır.-0-