BMT Baş Assambleyası Krımın anneksiyasını pisləyib, ekspertlər Rusiyanın cavabını verməyə çağırırlar

Cümə axşamı BMT Baş Assambleyası Krımın  anneksiyasının qanunsuz olduğunu tanıyan  “Ukraynanın ərazi bütövlüyü” adlı qətnamə qəbul edib.

Sənədi dəstəkləyən 100 ölkənin arasında Azərbaycan, Gürcüstan və Moldova var. 11 ölkə sənədin əleyhinə çıxış edib. Türkmənistan, Qırğızıstan və Tacikistan da daxil olmaqla bəzi ölkələr səs verməyiblər.

Azərbaycanın BMT-dəki nümayəndəsi Tofiq Musayev  iclasda çıxış edərək bildirib ki, Azərbaycan suverenlik və ərazi bütövlüyü prinsiplərinə sadiqdir.

Eyni zamanda o, Krımın köklü sakinləri – dəstək üçün Azərbaycan hakimiyyətinə müraciət edən tatarların hüquqlarından danışmayıb.

Öz növbəsində Türkiyənin BMT-dəki nümayəndəsi Krım tatarlarının hüquqlarını təmin etməyə və təhlükəsizliklərinə zəmanət verməyə çağırıb.

Ermənistan nümayəndəsi Karen Nazaryan deyib ki, onun ölkəsi dekolonizasiya və öz müqəddəratını təyinetməyə, münaqişələrin dinc yolla danışıqlar vasitəsilə həllinə tərəfdardır.

Gürcüstan nümayəndəsi deyib ki, Ukraynadakı vəziyyət 2008-ci il hadisələrini xatırladır. Rusiya Abxaziya və Sxinvali regionlarını işğal edib ki, bu da Gürcüstan ərazisinin 20%-ni təşkil edir.

Moldova nümayəndəsi bildirib ki, Krım referendumu qanunsuz olub, çünki Ukrayna Konstitusiyasına və beynəlxalq hüquqa ziddir.

Öz növbəsində Rusiya nümayəndəsi Krım sakinlərinin öz müqəddəratını təyinetmə hüququna hörmətlə yanaşmağa çağırıb.

ABŞ-dakı bəzi ekspertlər beynəlxalq birliyin Ukraynaya qarşı təcavüzünə zəif reaksiya verməsindən narahatdır.

ABŞ-ın NATO-dakı keçmiş səfiri Kurt Volker Turan-ın müxbirinə bildirib ki, hazırda çox mühüm məqamdır. Moldova, Gürcüstan, Ukrayna və Azərbaycan kimi NATO üzvü olmayan ölkələr NATO-nun özünü necə aparacığını müşahidə edir: Rusiyanın dərsini verəcək yoxsa Moskvanın keçmiş SSRİ-nin hissələrini necə topladığını seyr edəcək. “Buna yol verməmək üçün başda ABŞ olmaqla NATO hərəkət etməlidir”, - o vurğulayıb.

Senator Makkeyn bildirib ki, NATO tərəfdaşları Rusiyanın artan aqressiyası fonunda müdafiə xərclərini artırmalıdır. O həmçinin NATO-nu Vladimir Putinin ambisiyasını və onun əraziləri zəbt etmək cəhdlərini dəyərləndirməyə çağırıb.

Öz növbəsində Ukrayna Milli Təhlükəsizlik Şurasının rəhbəri Andrey Parubi Rusiyanın bütün qonşularını ehtiyatlı olmağa çağırıb. “Rusiya ilə sərhəddi olan heç bir ölkə özünü təhlükəsiz hiss edə bilməz”, - o bildirib..-25В-

* * *

BMT Baş Assambleyası 16 mart Krım referendumunu tanımayan qətnamə qəbul edib.

Baş Assambleyanın 100 üzvü qətnamənin lehinə səs verib, 58 nəfər bitərəf qalıb, bir nəfər əleyhinə səs verib.

“Ukraynanın ərazi bütövlüyü” adlı A/68L.39-cu qətnamədə qeyd olunur ki, Krım referendumu “heç bir hüquqi qüvvəyə malik deyil,  Krım Muxtar Respublikasının və ya Sevastopol şəhərinin statusunun dəyişdirilməsi üçün əsas ola bilməz”, - Unian bildirir.

Qeyd edək ki, Azərbaycan Ukraynanın ərazi bütövlüyünün dəstəklənməsinə səs verib.

Rusiya Federasiyası, Belarus, Zimbabve, Venesuela, Suriya, Ermənistan, Şimali Koreya, Kuba, Nikaraqua, Sudan qətnamənin əleyhinə səs veriblər.—0--