Cəmil Həsənli: hakimiyyət Yunuslara qarşı özbaşınalıq törədir

Demokratik Qüvvələrin Milli Şurasının (DQMŞ) sədri Cəmil Həsənli hüquq müdafiəçisi Leyla Yunusun və onun həyat yoldaşı Arif Yunusun dünən Bakı aeroportunda saxlanılmasını, vəkil olmadan onların əşyalarında axtarış həyata keçirilməsini, onlara qarşı təzyiqi, qanunvericilik normalarını pozmaqla mənzillərində axtarış həyata keçirmək cəhdlərini və A.Yunusun hipertoniya böhranına çatdırılmasını qətiyyətlə pisləyib.

“Baş verənlər gözlənilən idi. Milli Şuranın bəyanatında hadisələrin belə inkişafı ehtimalı proqnozlaşdırılmışdı”, deyə Həsənli Turan-ın müxbiri ilə söhbətində bildirib.

Yunusların başına gələnlər Konstitusiya və Azərbaycanın qoşulduğu beynəlxalq konvensiyalarla bir araya sığmır.

“Leyla Yunus fədakar hüquq müdafiəçisidir. Uzun illərdir, o, siyasi motivlərlə təqib olunan şəxslərin hüquqlarını ardıcıl olaraq müdafiə edir. O, öz vicdanını satmayan və ədalətsizliyə qarşı uzun mübarizə yolu keçən azsaylı insanlardan biridir”, deyə Həsənli bildirib.

Onun fikrincə, Yunus məhz fəal hüquq-müdafiə fəaliyyətinə və DQMŞ Koordinasiya Şurasında üzvlüyünə görə təqib edilir.

“Martın 3-də AXCP ofisi partladıldıqdan sonra Koordinasiya Şurasının iclasları Rövşən Əhmədlinin rəhbərlik etdiyi QHT-nin ofisində keçirilirdi. Lakin məkan sahibi onunla icarə müqaviləsini ləğv edib. Bundan sonra DQMŞ KŞ-nin iclasları SDİ-nin ofisində keçirilirdi. Biz artıq yarı zarafat – yarı ciddi hakimiyyətin bu ofisi də abadlaşdırma bəhanəsi ilə sökəcəyini proqnozlaşdırırdıq. Amma görünür, biz səhv etmişik, hakimiyyət daha ağır yol seçərək, Leyla Yunusu dövlətə xəyanətdə ittiham etməyə cəhd edib”, deyə Həsənli qeyd edib. -06B-