Cəmil Həsənli: Həyatım belə ölkənin irəli getməsi üçün lazımdırsa, ona da hazıram

Azərbaycan hakimiyyəti elə vəziyyətədir ki, 6 dəqiqəlik çıxışa dözümü yoxdur. Bu barədə Milli Şuranın prezidentliyə vahid namizədi Cəmil Həsənli bu gün RATİ-nin mətbuat mərkəzində keçirdiyi mətbuat konfransında bildirib. 

Sentyabrın 19-da İctimai Televiziyanın canlı efirində Həsənlinin ünvanına təhqiramiz ifadələr işlədilib, onun ailə həyatından danışılıb və su dolu butulka atılıb.      

Həsənli İctimai Televiziyanın efirində baş verənləri gözlənilən adlandırıb. “Prezidnetliyə  namizədlərin bir hissəsi hakimiyyətin pozuculuq fəaliyyətinin tərkib hissəsidir. Strategiya budur ki, real müxalifət hədəfdə olsun, amma seçicilərin real vəziyyətdən xəbəri olmasın”, deyə o qeyd edib. 

O, baş verənlərlə bağlı Mərkəzi Seçki Komissiyasına müraciət edib, məhkəməyə isə müraciət edəcək. Həsənli İctimai Televiziyanın onu efiri pozmaqda günahlandıran bəyanatını pisləyib. Həmçinin, müstəqil  ekspertlər tərəfindən baş verənlərlə bağlı videolentin ekspertizası keçiriləcək.  

“İctimai Televiziyanın efirində mən təhqir olunmuşam, mənim efir vaxtım kəsilib. Efir vaxtımda Hafiz Hacıyev göstərilib. Mən efir vaxtımın qaytarılması uğrunda mübarizəmi davam etdirəcəyəm”. 

O, həmçinin debat formasının düzgün seçilmədiyini və 6 dəqiqəlik efir vaxtından təklikdə istifadə etmək istədiyini diqqətə çatdırıb. Bu barədə ATƏT-in seçkiləri müşahidə missiyası ilə də danışdığını deyib.

Həsənli xəbərdarlıq edib ki, onun hədəfi Hafiz Hacıyev və digərləri deyil. “Mənim ailə həyatımla bağlı danışdılar. Amma mən Hafiz Hacıyev deyil, İlham Əliyevlə bağlı danışdım. Bundan sonra da belə olacaq. Mən heç kimin ailə həyatına müdaxilə etmək fikrində deyiləm. Bir daha bəyan edirəm ki, yenə bu mövzuda danışsalar, mənim hədəfim yenə İlham Əliyev olacaq”. 

O, Hafiz Hacıyevin namizəd kimi qeydə alınmasının ölkə üçün təhqir olduğnu deyib. “100 il öncə dünyaya demokratiya dərsi verən Azərbaycanda Hafiz Hacıyevin prezidentliyə namizəd olması təhqirdir”. 

Onun szölərinə görə, İlqar Məmmədovun qeydə alınmayıb, Hafiz Hacıyevin qeydə alınmasının müəllifləri Prezident Administrasiyasında oturub. “Onların hansı otaqlarda oturdularını da bilirik. Prezident Adminsitrasiyasında da Hafiz Hacıyevin namizədliyi ilə bağlı fikir birliyi olmayıb”, deyə o qeyd edib.    

Bunlara baxmayaraq, Milli Şuranın prezidentliyə namizədi iqtidarın və onun tərəfdarlarının seçki texnologiyalarının məğlub edildiyini deyib.

“Mən Milli Şuranın namizədindən xalqın namizədinə çevrildim. Biz televiziya vasitəsi ilə bir daha əsas müxalifət olduğumuzu təsdiq etdik”. 

Həsənli bəyan edib ki, ölkədə müstəqil televiziya olarsa, cəmi bir ay təbliğat aparılsa hazırki rejim çökər. “Bu, antimilli, çürümüş rejimdir. Bu rejim xalqın faciəsindən belə qazanc götürür (Kür daşqınları və şimal regionunda zəlzələ qurbanlarına ayrılan vəsaitlə bağlı korrupsiya hallarını xatırladıb)”, deyə prezidentliyə namizəd qeyd edib.    

Namizədin firkincə, hazırki rejim ölkəni Şimali Koreyaya çevirmək istəyir. “Bu hakimiyyət qarşısında güc görməlidir. Biz onlara bu imkanı verməyəcəyik”, deyə Həsənli bildirib. 

Onun fikrincə, Azərbaycan vacib bir mübarizənin təməlini qoyur. “Bu mübarizə yalnız seçki ilə məhdudlaşmayacaq. Mübarizə qələbəyə doğru gedir. Əgər mənim həyatım belə ölkənin irəli getməsi üçün lazımdırsa, ona da hazıram. Bu hakimiyyət ölkəni əraziyə çevirib”, deyə Milli Şuranın namizədi təhlükəsizliyinin təminatında da şübhələrin oduğuna işarə edib. -03C-