David Şahnazaryan: �Ermənistan hakimiyyəti azlığın hökumətinin formalaşdırılmasını təklif edir�

Yerevan/03.05.18/Turan: Ötən axşam Ermənistan Respublika Partiyasının nümayəndəsi Vaqram Bağdasaryan bildirib ki, onun partiyası parlamentin üçdə biri tərəfindən baş nazir postuna irəli sürülən namizədi dəstəkləyəcək. Faktiki olaraq, bu o deməkdir ki, respublikaçılar Nikol Paşinyanın namizədliyi ilə razılaşırlar.

Ermənistanın təhlükəsizlik xidmətinin keçmiş rəhbəri David Şahnazaryan "Şant" teleşirkətinə müsahibəsində Respublika Partiyasının təkliflərinin detallarını açıqlayıb ki, bu da mayın 8-də parlamentin növbəti iclasında həyata keçirilməlidir.

Onun sözlərinə görə, ən yaxşısı və ola bilsin ki, yeganə konstitusion variant belə görünür: üç parlament fraksiyası - "Yelk", Sarukyan bloku və Daşnaksütyun koalisiya yaradır və azlığın hökumətini formalaşdırır.

Parlament çoxluğuna malik Respublika Partiyası fraksiyalarla ilkin razılığa gəlib və bu hökumətin qanunlarını (konstitusion düzəlişlər də daxil olmaqla) qeyd-şərtsiz qəbul edəcək. Ancaq Respublika Partiyası heç bir siyasi məsuliyyət daşımayacaq. Bütün siyasi məsuliyyət azlığın hökumətinin üzərinə düşəcək.

Yeni hökumət əlavə seçkilər yolu ilə formalaşdırılacaq yeni parlament yaradılana qədər fəaliyyət göstərəcək.

Bütün razılaşmaların qarantı ölkə prezidenti olacaq. D.Şahnazaryanın sözlərinə görə, o, respublikanın dərin siyasi böhrandan çıxarılması prosesində "mühüm və müsbət rol oynayıb".

Qeyd edək ki, D.Şahnazaryan uzun illər Ermənistanın ilk prezidenti Levon Ter-Petrosyanın tərəfdaşı olub, ancaq iki il öncə Serj Sarkisyana tərəf yönəlib.-02D-