Deputat dövlət büdcəsinə daxilolmaların artmasına görə Gömrük Komitəsini və Vergilər Nazirliyini tərifləyir

Bakı/05.11.18/Turan: Dövlət Gömrük Komitəsinin rəhbərliyi dəyişdikdən sonra bu idarənin xətti ilə dövlət büdcəsinə daxilolmalar 800 mln. manat artıb. Bu barədə parlamentin deputatı Vahid Əhmədov bazar ertəsi Milli Məclisin iclasında bildirib.

2019-cu il dövlət büdcəsi layihəsinin müzakirəsi zamanı o qeyd edib ki, hökumətin korrupsiyaya, kölgə iqtisadiyyatına qarşı mübarizə siyasəti artıq nəticə verir.

Turan-ın müxbiri ilə söhbətində dediklərini şərh edən Əhmədov qeyd edib ki, DGK rəhbərliyi dəyişdikdən sonra (bu ilin aprelində) sahibkarların sıxışdırılması və əlavə vəsait tələb edilməsi təcrübəsinə son qoyulub.

Onun sözlərinə görə, 2018-ci ilin 9 ayı ərzində dövlət büdcəsinə vergi yığımlarından əlavə olaraq 800 mln. manat daxil olub. Bundan başqa, 2019-cu il büdcəsində bütün növ vergilər üzrə artımlar proqnozlaşdırılıb.

"Biz gömrük komitəsi ilə əlaqədar nə rüsumlarda, nə də vergilərdə ciddi qanun dəyişiklikləri etməmişik. Bu onun nəticəsidir ki, şəffaflıq təmin olunub. Bu da müəyyən qədər dövlət büdcəsinə əlavə vəsaitlərin daxil olmasına şərait yaradır. Azərbaycan 27 ildir ki, müstəqil dövlətdir və onun təxminən 20 ilində bu vəsaitlər mənimsənilib. Yəni bu yalnız Dövlət Gömrük Komitəsinə aid deyil, digər qrumlarda da belə halların qarşısı alınarsa, bizim dövlət büdcəmiz artar. Kölgə iqtisadiyyatı aradan qaldırılmış olar və dövlət büdcəsinə əlavə vəsaitlərin daxil olmasına nail ola bilərik", deyə Əhmədov bildirib. -06D-