Dörd ölkənin XİN başçıları birgə bəyannamə imzalayıblar

Bakı/15.03.18/Turan: Martın 15-də Bakıda Azərbaycan, Türkiyə, İran və Gürcüstan XİN başçılarının görüşündə Cənub-Qərb nəqliyyat dəhlizinin yaradılması məsələsi müzakirə olunub, bu barədə Azərbaycan XİN başçısı Elmar Məmmədyarov mətbuat konfransında bildirib.

Görüşün yekunlarına görə birgə bəyannamə imzalanıb.

Bu sənəd infrastruktur, nəqliyyat, kənd təsərrüfatı sahələrində əməkdaşlığı genişləndirməyə imkan verəcək, deyə Məmmədyarov bildirib.

"Biz yeni layihələr üzərində işləyirik və səylərimizi birləşdirməyə, dünyanın böyük regionlarını birləşdirəcək format yaratmağa və onu möhkəmləndirməyə ümid edirik", deyən nazir əlavə edib ki, yeni nəqliyyat dəhlizi Hind və Atlantik okeanlarını birləşdirməyə imkan verəcək.

Dördtərəfli əməkdaşlıq əlaqələrin və ticari münasibətlərin inkişaf etdirilməsi üçün mövcud imkanlardan istifadə etməyə şərait yaradacaq, deyə Gürcüstan XİN başçısı Mixail Canelidze bildirib.

İran XİN başçısı Cavad Zərif nazirlərin energetika, yüklərin tranziti, turizm və digər məsələləri müzakirə etdiklərini təsdiq edib.

Türkiyə xarici işlər naziri Mevlut Çavuşoğlu qeyd edib ki, dörd ölkənin işgüzar dairələri yeni nəqliyyat dəhlizinin həyata keçirilməsi zamanı böyük əməkdaşlıq imkanları əldə edəcəklər.

Dördtərəfli formatda növbəti görüş Gürcüstanda keçiriləcək. -02D-