Ekspert: �Avropa məhkəməsinin qərarı gecikib�

Avropa İnsan Hüquqları Məhkəməsi (AHİM) “Ruşaniyə Hüseynova Azərbaycan hökumətinə  qarşı” iş üzrə qərarı elan edib. Qərarda deyilir ki, Azərbaycan hökuməti “Monitor”  jurnalının baş redaktoru Elmar Hüseynovun qətli üzrə cinayət işini effektiv araşdırmayıb, jurnalistin qatillərinin məsuliyyətə cəlb edilməsi üçün lazımi addımlar atmayıb.

Məhkəmə qərara alıb ki, hökumət Avropa İnsan Hüquqları Konvensiyasının 2-ci maddəsini (effektiv araşdırmanın aparılmaması) pozub və məhrum jurnalistin xanımı Ruşaniyə  Hüseynovaya 20 min avro, məhkəmə və hüquqi xərclərə görə 10 min avro ödənilsin.

contact.az məlumat verib ki, bu barədə AİHM-in məlumatında bildirilir.

Qərarda deyilir ki, E.Hüseynov öz tənqidi məqalələrinə görə dəfələrlə hakimiyyət tərəfindən hədələrə məruz qalıb, 34 dəfə məhkəmə məsuliyyətinə  cəlb olunub. 2004-cü ilin yanvarında polis əməkdaşları ondan prezidentin və onun ailəsinin ünvanına tənqidi məqalələrin dərcinə son qoymasını tələb etmişdi, əks halda haqq-hesab çəkiləcəyilə hədələmişdi.

“Avropa məhkəməsinin qərarı çox gecikib, 12 ildən sonra elan edilib və bu, heç də ədalətli deyil”, - media məsələləri üzrə ekspert Ələsgər Məmmədli contact.az- a bildirib. “Ancaq nəzərə alsaq ki, məhkəmə pozuntunu tanıyıb, bu qərarı müsbət hadisə hesab etmək olar. 20 min avro həcmində kompensasiya ailə başçısının ölümünə   və ya itkisinə görə verilmir, istintaqın yubadılmasına və araşdırmanın ədalətsiz gedişinə görə verilir.

Avropa məhkəməsinin qərarlarının icrası ilə bağlı xüsusi prosedur var və bu, kompensasiya ödənişinə aiddir. İndiki halda həmçinin istintaqa mane olan obyektiv və subyektiv səbəblərin aradan qaldırılması, təhqiqat prosesinin sürətləndirilməsi, qanundakı boşluqların ləğvi nəzərdə tutulub. Şübhəsiz ki,  Avropa məhkəməsinin bu qərarı müəyyən dəyişikliklər tələb edir, ancaq bunun həyata keçirilib keçirilməyəcəyini zaman göstərəcək. Şəxsən mən işlərin müsbət nəticələnəcəyinə çox inanmıram. Əgər irəliləyiş olsaydı Elmar  Hüseynovun qətlindən keçən 12 il ərzində olardı”,- Ə.Məmmədli qeyd edib.

“Elmar Hüseynovun işi üzrə Avropa Məhkəməsinin qərarını ədalətli hesab edirəm, çünki  onun qətlinin effektiv araşdırılmaması göz önündədir”,- hüquqşünas Əsabəli Mustafayev contact.az –a bildirib.  “Lakin böyük həcmdə kompensasiya gözlənilirdi. Çünki söhbət tanınmış jurnalist, ailə başçısından gedir. Jurnalistin qatilləri indiyədək tapılmayıb, halbuki, ictimaiyyət arasında onların şəxsiyyəti haqda geniş informasiya yayılıb, müxtəlif versiyalar səslənib.

Hakimiyət nə edəcək, onu gələcək göstərəcək. Düşünürəm ki, onlar bu qərardan ibrət götürəcək. İstintaq bərpa edilməlidir, icraçılar, xüsusilə qətlin sifarişçiləri tapılıb cəzalandırılmalıdır. Əks halda bu, ölkənin imicinə ziyan vuracaq. Çünki Avropa məhkəməsinin bu qərarı daim Avropa Şurasının və yerli ictimaiyyətin diqqət mərkəzində olacaq”,- Ə.Mustafayev bildirib.