Ekspertiza prezident Turqut Özalın zəhərlənməsini təsdiqləyib

Türkiyə mediası ölkənin 8-ci prezidenti Turqut Özalın nəşində yüksək miqdarda “strixnin kreatin” maddəsinin aşkarlandığını yazır. 

Turqut Özal 1993-cü ilin aprelində vəfat edib. T.Özalın vəfatının təbii olmaması haqda ilk şübhələri mətbuat katibi Arif Yüksəl prezident vəfat edən gün Gülhanə Tibb Akademiyasında bildirib. Belə ki, mətbuata açıqlamasında A.Yüksəl meyitin yarılmasını tələb etdiyini, amma rəsmi Ankara təmsilçilərinin “ailəsi razı deyil” adıyla bu addımı atmadığını qeyd edib. Zəhərlənmə faktına gəlincə, Türkiyə ekspertiza qurumları bu zəhərin prezidentə ya yeməyin, ya da içəcəyi suyun içində verildiyini nəzərə çatdırırlar. 

Ölüm faktının nədən baş verməsini müəyyən etmək üçün Türkiyə prezidenti Abdulla Gül iyunun 11-də xüsusi təlimat hazırlayıb. Həmin təlimata əsasən qəbir açılıb. Oktyabrın 2-də mərhum prezidentin qəbirini açdıraraq nəşin saçından, daxili orqanlarından və bədənin digər hissələrindən nümunələr götürülüb. Aparılan təhqiqat zəhərlənməni aşkar edib. 

Türkiyənin bəzi tibb alimləri bu zəhərin nəfəs yollarını iflic hala salaraq, ürəkdə tıxanma yaratmaqla 15-20 dəqiqə içində ölümü gerçəkləşdirdiyini deyilər. Zəhərin dozası azlığı üzündən ölümə səbəb olmayanda bədəndə fəsadlar yaradır. Alimlər həm də bu zəhərin siçan və köpəklərin öldürülməsində istifadə olunduğunu qeyd ediblər.

Mediada T.Özalın halının pisləşdiyi və sonra da vəfat etdiyi gün prezident iqamətgahında tibbi ambulansın olmaması, yolda tıxac üzündən Gülhanə tibb müəssisəsinə çatmaq gec olacağı üçün Hacəttəpə xəstəxanasına gətirilməsi, Hacəttəpə xəstəxanasında prezidenti müayinə üçün hazırlığın görülməməsi kimi faktllar yer alır. Bununla dolayısı ilə T.Özalın vəfatının qarşısının alınmasında səhlənkarlıq olması diqqət mərkəzinə gətirilir. T.Özalın nəşi Gülhanə Tibb Akademiyasına yalnız prezident vəfat edəndən sonra gecə müayinə üçün gətirilib. 

Zəhərlənmə faktının aşkarlanması ilə bağlı mətbuata ilk açıqlamanı mərhum prezidentin oğlu Əhməd Özal verib. “Mən buna təəccüblənmədim. Sadəcə 18 ildir bildiyim bir hadisə təsdiqiini tapdı. İndi qalır bu əməlləri edənlərin üzə çıxarılmaları”, - Ə.Özal mövqeyini izah edib.-05D-