Əli Həsənovun Moskva missiyasının gizlinləri

Hakimiyyətin baş ideoloqu Əli Həsənov Moskvadan növbəti “məxfi” missiyadan qayıdıb. Bəzi  KİV-ə sızan məlumata görə, o, Rusiya Prezident Administrasiyasının nümayəndələri ilə danışıqlar aparıb. 

Missiyanın məqsədinə gəlincə, Ə.Həsənov həmin KİV-lərə bildirib ki, orada ikitərəfli münasibətlər, regional forumların keçirilməsi müzakirə olunub. Lakin görüşlərlə bağlı konkret qərarları və yekunları açıqlamayıb. 

Prinsipcə, bu səfərdə qeyri-adi bir şey yoxdur. Amma qəribədir ki, bu cür missiya XİN rəhbərinə və ya onun müavininə deyil, diplomatiyadan uzaq bir adama həvalə edilir. Lakin bu, Ə.Həsənovun ilk belə missiyası deyil. Bundan əvvəl Tehrana göndərilmişdi ki, pozulmuş münasibətləri “yoluna qoysun”. Oradan qayıdan Ə.Həsənov fəxrlə bildirdi ki, onu çox yüksək səviyyədə (mədəniyyət nazirinin müavini) qəbul ediblər və ikitərəfli münasibətlərdə mövcud problemlər həll olunub. Lakin demək olar ki, bundan dərhal sonra Tehran Bakını sionistlərlə əməkdaşlıqda və antiiran siyasətində ittiham etdi. Sonra İranda iki azərbaycanlı şair həbs olundu. Bütün bunlardan sonra Ə.Həsənov İranın ünvanına açıq tənqid və rişxənd yağdırmağa başladı.  

Rusiya ilə münasibətlərə gəlincə, qeyd edək ki, son günlər rəsmi Bakı Moskvada zəngin azərbaycanlıların daxil olduğu yeni diaspor təşkilatının yaradılmasından qıcıqlandığını gizlətmir. Onların arasında prezident İlham Əliyevin qudası Araz Ağalarov da var. Ümumrusiya Azərbaycanlıları Konqresinə alternativ qurumun yaradılması Moskvanın Azərbaycan hakimiyyətinə təzyiq göstərmək üçün həmin şəxslərdən istifadə cəhdi kimi qiymətləndirilib.

Münasibətlərdə gərginlik Qəbələ RLS-in taleyinə dair məsələni tərəflərin həll edə bilməməsindən sonra nəzərə çarpmağa başlayıb.

Bütün bunları nəzərə alaraq, belə nəticəyə gəlmək olar ki, ikitərəfli münasibətlərdəki problem hər iki ölkənin birinci şəxsləri səviyyəsində həllini tapa bilər. Bu məqsədlər üçün Moskvaya Ə.Həsənovun göndərilməsi çox güman ki, Tehran səfərinin yekunları kimi nəticələnəcək.-02B-