Əliyev Vuçiçi səfərə dəvət edib. Səfər dekabrın ortalarına qədər baş tutacaq

Bakı/23.11.22/Turan: Noyabrın 23-də dövlət başçısı İlham Əliyev Serbiyaya rəsmi səfərə gəlib.

Serbiya prezidenti Aleksandr Vuçiçlə tet-a-tet danışıqlardan sonra geniş tərkibdə danışıqlar aparılıb.

Azərbaycan prezidenti İlham Əliyevin və Serbiya prezidenti Aleksandr Vuçiçin geniş tərkibdə görüşünün yekunlarına görə bir sıra sənədlər imzalanıb.

Sənədlərin imzalanması mərasimi başa çatdıqdan sonra Əliyev və Vuçiç mətbuat üçün bəyanat veriblər.

Prezident Vuçiç deyib ki, bir sıra mühüm mövzuların müzakirəsini davam etdirmək üçün yaxın 20 gündə Bakıya işgüzar səfərə gedəcək, xəbəri Serbiyanın dövlət agentliyi - Tanyuq yayıb. O bildirib ki, çox konkret sazişlər vasitəsilə bu strateji tərəfdaşlığı dərinləşdirmək üçün özü ilə çox sayda nazir aparacaq.

Vuçiç qeyd edib ki, iki ölkənin bir çox ortaq cəhətləri var, ilk növbədə, onlar sarsılmaz şəkildə öz ərazi bütövlüklərini müdafiə edirlər və BMT Nizamnaməsinə və bu sənədə əsaslanan beynəlxalq-hüquqi normalara riayət edərək, beynəlxalq müstəvidə, beynəlxalq institutlarda bir-birinə kömək edirlər.

 "Qorxuram ki, bu gün mən də Əliyevdən bu barədə çox şey öyrəndim, beynəlxalq hüquqdan çox az şey qalıb və cəmi onlarla ölkə bu beynəlxalq ictimai hüquqi nizama riayət edir, çünki biz hesab edirik ki, bu, gələcək üçün yeganə imkan və variantdır", deyə o vurğulayıb.

Vuçiç qeyd edib ki, Serbiya və Azərbaycan saziş imzalayaraq, öz əməkdaşlıqlarını və münasibətlərini yeni səviyyəyə qaldırırlar.

O bildirib ki, onlar bütün mühüm məsələləri müzakirə ediblər, onlar arasında energetika da olub. "Məhz buna görə biz Serbiya və Bolqarıstan arasında interkonnektorun yaradılması üzərində işləyirik ki, Bakıdakı dostlarımızdan böyük həcmdə qaz ala bilək".

"Bir müddət əvvəl biz zarafatlaşdıq və Əliyev mənə dedi ki, Azərbaycan şirkətinin bizim üçün Liqadan Prelyinaya gedən yolun bir hissəsini tikdiyini və bizim bir gün belə gecikmədən yerinə yetirilən işlərə görə vaxtından bir il əvvəl ödəniş etdiyimizi gördükdə inana bilməyib".

"Biz 2011-ci ildə götürdüyümüz bütün borcumuzu bir il əvvəl ödədikdə onlar təəccüblənmişdilər", deyə prezident Vuçiç bildirib.

"Serbiyanın adəti belədir, imkanı olanda borclarını vaxtından əvvəl qaytarır. Və buna görə Azərbaycan tərəfi bilir ki, Serbiya etibarlı tərəfdaşdır, biz də bilirik ki, Əliyev və Azərbaycan təkcə bizim üçün deyil, hamı üçün etibarlı tərəfdaşdır".

"Biz şəffaf protokolun bütün məsələləri üzrə saziş imzalamalıyıq, amma Əliyevin sözü bizə kifayətdir", deyə prezident Vuçiç əlavə edib.

Serbiya prezidenti deyib ki, gübrə çatışmazlığı kimi digər mühüm məsələlərdə müzakirə edilib və o, onların öz neft-kimya zavodlarını tikdiklərini eşidib.

O, əlavə edib ki, hərbi-texniki əməkdaşlıq və beynəlxalq müstəvidə qarşılıqlı fəaliyyətin təkmilləşdirilməsi də müzakirə olunub.

Vuçiç deyib ki, iki ölkənin hər iki xalqın maraqları və rifahı üçün birlikdə edə biləcəyi hələ çox şey var.

"Biz strateji müttəfiqlərik və bizim strateji hədəflərimiz var, - deyə Vuçiç qeyd edib, - bizim dövlətlərimizin ərazi bütövlüyünü müdafiə etmək məqsədimiz də birdir".

Əliyev qeyd edib ki, bütün beynəlxalq təşkilatlar Azərbaycanın ərazi bütövlüyünü dəstəkləyirdilər, amma onların həlli selektiv xarakter daşıyırdı. "Və biz 27 il bu problemi həll edə bilmirdik. Biz ərazi bütövlüyümüzü bərpa etmək üçün beynəlxalq hüquqa uyğun olaraq gücdən istifadə etmək məcburiyyətində qaldıq".

O bildirib ki, indi azad edilmiş ərazilərin bərpası prosesi gedir.

"Biz təhlükəsizlik, energetika məsələlərini müzakirə etdik. Bizim əməkdaşlıq üçün şəraitimiz var. Azərbaycanın energetika sahəsində böyük potensialı var. Biz müvafiq sənədləri imzaladıq və prezidentlər olaraq onların icrasına nəzarət edəcəyik", deyən Əliyev qeyd edib ki, dialoqu dərinləşdirmək məqsədilə Vuçiçi Azərbaycana səfərə dəvət edib. Serbiya prezidenti üç il əvvəl Azərbaycanda səfərdə olub. 

Səfər zamanı Prezident Əliyevin və Serbiyanın Baş naziri Ana Brnabiçin geniş tərkibdə görüşü olub.—0—