Elmar Məmmədyarov Bolqarıstan prezidentilə görüşüb

Bakı/31.10.18Turan: Xarici işlər naziri Elmar Məmmədyarov Bolqarıstana səfəri çərçivəsində bu ölkənin prezidenti Rumen Radevlə görüşüb. Bu barədə Azərbaycan Xarici İşlər Nazirliyinin məlumatında deyilir.

Görüş zamanı iki ölkə arasında yüksək səviyyəli əməkdaşlıq münasibətlərindən məmnunluq ifadə olunub.

Hər iki tərəf əməkdaşlıq münasibətlərinin daha da inkişaf etdirilməsində maraqlı olduğunu vurğulayıb.

Energetika və nəqliyyat sahələrində əməkdaşlığın dərinləşdirilməsinə hər iki ölkə tərəfindən önəm verildiyi xüsusi qeyd oliunub.

Prezident R.Radev 2017-ci ilin oktyabrında Azərbaycana səfəri çərçivəsində prezident İlham Əliyevlə birgə bəyanatlarının davamı olaraq Bakı-Sofiya birbaşa hava xəttinin açılmasını çox yüksək qiymətləndirib.

Bu hava xəttinin açılması ilə tərəflər arasında xüsusilə turizm sahəsində əlaqələrin inkişafı baxımından mühüm rol oynadığı bildirilib.

Görüşdə prezident İlham Əliyevin 2015-ci ilin martında Bolqarıstana rəsmi səfəri zamanı imzaladığı "Azərbaycan Respublikası ilə Bolqarıstan Respublikası arasında strateji tərəfdaşlıq haqqında birgə bəyannamə"nin iki ölkə arasında münasibətlərin hərtərəfli inkişaf etdirilməsi üçün əlverişli siyasi zəmin yaratdığı ifadə olunub.

Xatırladaq ki, səfər çərçivəsində Azərbaycan və Bolqarıstan respublikaları arasında strateji dialoqun birinci iclası keçiriləcək.-05D-