Elmar Məmmədyarovun Efiopiya səfəri davam edir

Bakı/10.11.17/Turan: Azərbaycanın xarici işlər naziri Elmar Məmmədyarov Efiopiyaya səfəri çərçivəsində Afrika İttifaqının sülh və təhlükəsizlik məsələləri üzrə komisarı Smail Şərqi ilə görüşüb

Görüş zamanı

E. Məmmədyarov Azərbaycanın 2012-2013-cü illərdə BMT Təhlükəsizlik Şurasının qeyri-daimi üzvü olan zaman Afrika qitəsində sülh və təhlükəsizlik problemlərinə xüsusi diqqət yetirdiyini nəzərə çatdırıb. O həmçinin Azərbaycanın regional və beynəlxalq səviyyədə sülh və təhlükəsizliyin təmin olunmasına verdiyi töhfələrindən danışıb.

Azərbaycanın ikitərəfli və çoxtərəfli əsasda Afrika dövlətləri ilə əlaqələrin inkişafına əhəmiyyət verdiyini deyən nazir qitə dövlətləri ilə Azərbaycan arasında Cənub-Cənub əməkdaşlığı kontekstində siyasi, iqtisadi, humanitar, elm-təhsil və digər sahələrdə əməkdaşlıq üçün geniş imkanların olduğunu diqqətə çatdırıb.

Öz növbəsində S.Şərqi səfərin Afrika İttifaqı ilə Azərbaycan arasında dialoqun və əməkdaşlığın inkişafına mühüm töhfə verdiyini bildirib.

Görüş zamanı Afrika İttifaqı ilə Azərbaycan arasında dialoq və məsləhətləşmələrin davam etdirilməsi, nümayəndə heyətlərinin səfərlərinin həyata keçirilməsi və qarşılıqlı maraq doğuran sahələrdə təcrübə mübadiləsinin aparılmasının əhəmiyyəti vurğulanıb. Məlumatı XİN mətbuat xidməti yayıb.

Xatırladaq ki, Afrika İttifaqına 54 Afrika ölkəsi daxildir. İttifaq Afrika Birliyinin hüquqi varisidir. Afrika İttifaqı 2002-ci ilin iyulunda yaradılıb. 2011-ci ildə Azərbaycan bu təşkilatda müşahidəçi statusu alıb.

Elmar Məmmədyarov noyabrın 8-dən Efiopiyada səfərdədir. O, səfər çərçivəsində ölkə prezidenti, baş nazir, xarici işlər naziri və digər rəsmi şəxslərlə görüşlər keçirib.-0-