Elşad Abdullayevin qardaşı oğlu həyatına təhlükə olduğunu bildirir

Bu gün Mahir Abdullayevin Hüquqlarını İctimai Müdafiə Komitəsi fəaliyyəti dayandırılmış Beynəlxalq Universitetin hazırda Fransada mühacirətdə olan sabiq rektoru Elşad Abdullayevin həbsdə olan qardaşı oğlu Abdullayev Mübarizlə bağlı məlumat yayıb. 

Məlumatda deyilir ki, Mübariz Abdullayev hazırda saxlandığı 3 saylı cəzaçəkmə müəssisəsindən oğlu Tehran Abdullayev vasitəsi ilə onunla bağlı istintaqın qərəzli aparılması, istintaq zamanı döyülərək dişlərinin sındırılması və bunun müqabilində əmisi Elşad Abdullayevin əleyhinə ifadə alındığını bildirib.

Mübariz Abdullayev 2013-cü il avqustun 21-də Lənkəran Ağır Cinayətlər Məhkəməsinin hökmü ilə məhkəmə zalında həbs edilib. Məhkəmə onu Cinayət Məcəlləsinin 182.3.2 (hədə-qorxu ilə külli miqdarda əmlak tələb etmə) maddəsi ilə 10 il həbsə məhkum edib. Cinayət işi 2003-cü ildə Elşad Abdullayevin qardaşı Mahir Abdullayev oğurlandıqdan sonra Kürdəmir rayon Polis Şöbəsində qaldırılıb. Amma, istintaq işləri 2012-ci ildə Elşad Abdullayev videolar yaydıqdan sonra davam etdirilib.  

Mübariz Abdullayevin oğlu Tehran Abdullayev deyib ki, atası hazırda cəzaçəkmə müəssisəsində qorxu içərisində yaşayır. O bildirib ki, hər an atasının həyatına təhlükə var. “Atam bizim vasitəmizlə ölkə rəhbərlərinə müraciət edir ki, onunla bağlı aparılan istintaq tam yanlışdır. O, heç zaman Elşad Abdullayevlə telefonla danışmayıb. 2003-cü ildə onun mobil telefonu olmayıb. Cinayət işində maddi sübut kimi göstərilən mobil telefon (050 3843308) o zaman Kürdəmir rayon Polis Şöbəsinin rəis müavini işləmiş Qalib Tağıyevindir. Belə ki, 2003-cü ildə Ziya Səmədov (hazırda həbsdədir) adlı polis işçisi atam Mübariz Abdullayevi heyvan üçün ot almaq adı ilə çayxanaya dəvət edib, mobil telefonu stolun üstünə qoyub və  bu zaman iki polis əməkdaşı atamı saxlayıb, telefonun ona məxsus olduğunu bildirib. Bu əsasla da atama qarşı cinayət işi başlanıb”, deyə o qeyd edib. 

Tehran Abdullayev atasının barəsində cinayət işinin yenidən ibtidai istintaqa qaytarılmasını, onun və ailə üzvlərinin təhlükəsizliyinin təmin edilməsini ölkə rəhbərliyindən xahiş edir.       

Maraqlıdır ki, Elşad Abdullayev etiraz etməsinə baxmayaq bu işdə zərərçəkmiş qismində tanınıb. 

Mübraiz Abdullayev guya həmin mobil telefonla dəfələrlə əmisi Elşad Abdullayevə zəng edib və pul müqabilində onun qardaşı, özünün isə digər əmisi Mahir Abdullayevi qaytaracağını deyib. Elşad Abdullayev mediaya açılamlarında ona zəng edən şəxsin polis rəisinin müavini Qalib Tağıyevin olduğunu bildirib. 

Elşad Abdullayevin qardaşı Milli Təhlükəsizlik Nazirliyinin mayoru Mahir Abdullayev 2003-cü il oktyabrın 13-də oğurlanıb. Mahir Abdullayevlə bağlı indiyədək hər hansı xəbər yoxdur. İstintaq orqanları Mahir Abdullyevin oğurlanması ilə bağlı cinayət işi üzrə indiyədək bir nəticə əldə edə bilməyib. Ölkə prezidentinin tapşırığı ilə 2013-cü ilin martında Müstəqil İstintaq Komissiyası yaradılıb. Bu komissiya da Mahir Abdullayevin oğurlanması ilə bağlı cinayət işində irəliləyişin  olub-olması barədə indiyədək ictimaiyyətə məlumat verməyib. Elşad Abdullayev 2012-ci ildə bir çox yüksək vəzifəli şəxsləri ifşa edən videolar yaydıqdan sonra cinayət işi üzrə çoxsaylı dindirmələr başlayıb. -03B-