Ermənilər Tərtərə artilleriyadan atəş açmağa davam edirlər

Çərşənbə günü axşam saatlarında erməni qoşunları Tərtər rayonunda yaşayış məntəqələrinə artilleriyadan atəş açmağa davam ediblər.

Müdafiə Nazirliyinin Mərkəzi xidmətinin rəhbəri Vaqif Dərgahlının verdiyi məlumata görə, düşmən saat 23.30-dan etibarən qoşunların təmas xəttinə yaxın yaşayış məntəqələrini atəşə tutmağa başlayıb.

Xüsusən, D-30 haubitsalarından Tərtər rayonunun Qapanlı və Qazdan kəndlərinə və Tərtər şəhərinə atəş açılıb. Azərbaycan Silahlı Qüvvələri düşmənin atəş açılan mövqelərinə cavab zərbələri endirir.

Qeyd edək ki, son iki gündə ermənilər Tərtər şəhərinə və rayonun kəndlərinə kütləvi atəş açır.

Aprelin 28-i səhər saatlarına olan məlumata görə, Tərtər rayon mərkəzinə və rayonun kəndlərinə, habelə Ağdam rayonunun qonşu kəndlərinə gecə atəş açılması zamanı 8 dinc sakin yaralanıb. Ağdam icra hakimiyyətinin nümayəndəsinin Turan-a verdiyi məlumata görə, Ermənistan tərəfi yaşayış evlərini və təsərrüfat obyektlərini atəşə tutub. Ümumilikdə 50-dən çox evə və heyvandarlıq fermasına ziyan dəyib. 11 böyük baş mal-qara tələf olub. Qaradağlı, Afətli, Çəmənli kəndlərində şəxsi təsərrüfatlara ciddi ziyan dəyib. -06D-