Əvəz Zeynallının barəsində hökm siyasi sifarişdir
Bir qrup media təmsilçisi “Xural” qəzetinin redaktoru Əvəz Zeynallının azadlıqdan mərhum olunması ilə bağlı çərşənbə günü RATİ-də mətbuat konfransı keçirib.
Media mənsubları Ə.Zeynallının həbsini birmənalı olaraq siyasi sifariş adlandırıblar. Martın 12-də redaktorun barəsində çıxarılan 9 il müddətinə azadlıqdan məhrum olunma qərarını həmin siyasi sifarişin təsdiqi kimi dəyərləndiriblər. Belə ki, ölkənin müstəqil media mənsubları, jurnalist qurumları Ə.Zeynallı həbsə alınarkən bu həbsin siyasi sifariş olduğunu bəyan etmişdilər.
Məhkəmə istintaqının aparılmaması, keçmiş deputat, bu məhkəmə prosesində əsas şahid, hazırda müttəhim olan Gülər Əhmədovanın Ə.Zeynallıya qarşı rüşvət tələb etməsi ittihamı özünü doğrultmadı. Bundan əlavə, 70 min manat həcmində vergidən yayınmanın sonda 4 min manata düşməsi ittihamların əsassız olduğunu bir daha təsdiqlədi. İbtidai istintaqda Ə.Zetynallıya rüşvət verdikləri haqda ifadə verənlərin bəzilərinin məhkəmədə ifadələrini danmaları xatırladıldı. Şahidlərin ifadələrindəki ciddi ziddiyyətlər araşdırılmadı.
Buna görə də media mənsubları məhkəmə qərarının özünü hüquqi qərar yox, siyasi qərar kimi qiymətləndirdilər. Bu siyasi həbsin arxasında PA rəhbəri Ramiz Mehdiyevin, “Azərbaycan” nəşriyyarının direktoru Ağabəy Əsgərovun, KİV-lərin İnkişafına Dövlət Dəstəyi Fondunun rəhbəri Vüqar Səfərlinin durduğunu bəyan etdilər. Media mənsubları bu qərarı təkcə Ə.Zeynallının həbsi kimi yox, həm də azad sözə, ifadə azadlığına təhdid kimi dəyərləndirdilər. Bununla yanaşı bu təhdidləri ayrı-ayrı məmurların özbaşınalığı kimi deyil, bütünlükdə iqtidarın ifadə azadlığına münasibətinin göstəricisi saydılar.
Bu təhdidlərə baxmayaraq, media mənsubları azad söz və ifadə azadlığı uğrunda mübarizədən kənara çəkilməyəcəklərini bəyan etdilər. Aparılan mübarizə nəticəsində bu il ərazində Ə.Zeynallının həbsdən azad oluna biləcəyinə inam bildirdilər.
Mətbuat konfransında bir qrup media nümayəndələrinin ölkədəki xarici ölkə səfirlikləri ilə görüşərək diplomatları bu həbslə tanış etmələri haqda məlumat səsləndirildi.
Ə.Zeynallı 2011-ci ilin oktyabrında həbsə alınıb, ona qarşı zorla rüşvət tələb etmə, vergidən yayınma və s. ittihamlar irəli sürülüb. İrəli sürülən ittihamların heç biri məhkəmədə təsdiqini tapmayıb. Buna baxmayaraq, Bakı Ağır Cinayətlər Məhkəməsinin hakimi Ramella Allahverdiyeva Ə.Zeynallının barəsində 9 il azadlıqdan məhrumetmə cəzası çıxarıb. Məhkəmədə əsas şahid olan keçmiş deputat G.Əhmədova özü dələduzluq ittihamı həbs olunub. -05C-
Rəy yaz