Gənc fəalların həbsi haqqında qərardan şikayət veriləcək (YENİLƏNİB)

Səbail rayon məhkəməsinin üç gənc fəal – Ülvi Həsənli, Məcid Mərcanlı və Kənan Qasımlı barəsində polisə müqavimət göstərmək ittihamı ilə 15 günlük həbs qərarından apellyasiya məhkəməsinə şikayət veriləcək. Bu barədə Turan-a vəkil Elçin Sadıqov bildirib.

Sadıqovun sözlərinə görə, hakim vəkilin gəlməsini gözləmədən işə baxmağa başlayıb. Vəkilə həmçinin hakimin qərarının mətni təqdim edilməyib və müvəkkillərinin məhz nədə ittiham olunduğu aydın deyil. Sadıqovun öz müvəkkilləri ilə məxfi görüşünə də icazə verməyiblər.

Xatırladaq ki, “Azad gənclik” təşkilatının sədri Ülvi Həsənli dünən metronun “Nizami” stansiyasının yaxınlığında saxlanılıb və yaxınlıqda yerləşən metropolitenin polis idarəsinə aparılıb. Sonradan təşkilatın digər fəalı Məcid Mərcanlı, habelə NİDA hərəkatının fəalı Kənan Qasımlı da oraya çağırılıb.

Buna görə onların nə vaxt və harada birgə “polisə müqavimət göstərdikləri” məlum deyil. -16D06-

2013 İyul 15 (Bazar ertəsi) 14:32:43

Səbail rayon məhkəməsi bazar ertəsi dünən saxlanılan üç gənc fəal barəsində 15 gün müddətinə həbs qərarı çıxarıb.

Məhkəmə “Azad gənclik” təşkilatının sədri və üzvü Ülvi Həsənli və Məcid Mərcanlını, habelə NİDA fəalı Kənan Qasımlını 310.1-ci (polisə müqavimət göstərmək) maddə ilə təqsirli bilib.

Gəncləri vəkilsiz mühakimə ediblər. -16D06-

***

 Ötən gün saxlanılan üç gənc fəal – Ülvi Həsənli, Məcid Mərcanlı və Kənan Qasımlı inzibati qanun pozuntusuna yol verməkdə ittiham olunurlar. Onlar əsasən polis əməkdaşlarının qanuni tələblərinə tabe olmamaqda təqsirli bilinirlər. Bu barədə Turan-a DİN mətbuat xidmətinin rəhbəri Orxan Mənsurzadə məlumat verib. 

Onun sözlərinə görə, gənclərin barəsində İnzibati Xətalar Məcəlləsinin 311.1 maddəsi üzrə protokol tərtib olunub və müvafiq tədbirlərin görülməsi üçün məhkəməyə göndərilib.

Qeyd edək ki, bu maddə üzrə 1 ayadək müddətə həbs qərarı çıxarıla bilər. —--

2013 İyul 15 (Bazar ertəsi) 10:52:56

Hüquq-mühafizə orqanları üç gənc fəal Ülvi Həsənli, Məcid Mərcanlı və Kənan Qasımlının saxlanmasının səbəblərini açıqlamırlar.

Onlar ötən gün Bakı metropoliteninin Polis İdarəsi tərəfindən saxlanılıblar. Axşam onları həmin idarədən çıxarıblar, lakin saxlandıqları yer məlum deyil.

Nə DİN, nə də Baş Prokurorluq saxlanmanın səbəbləri barədə rəsmi məlumata malik deyil.

Vəkil Əsabəli Mustafayev dünən axşamdan onların saxlandığı yeri öyrənməyə çalışır.

Dünən saxlanılan, lakin sonradan buraxılan NİDA fəalı Emil Bağırov bildirib ki, gənclərin saxlanmasına bir neçə gün öncə metroya vərəqələrin yapışdırılması səbəb olub. 

Ü.Həsənli “Azad gənclik” hərəkatının rəhbəridir, M.Mərcanlı isə bu təşkilatın fəalıdır. Onların hər ikisi Milli Şuranın üzvləridir. K.Qasımlı NİDA təşkilatının İdarə Heyətinin üzvüdür.-16D06-

2013 İyul 14 (Bazar) 22:06:44

İyulun 14-də saat 15.30-a yaxın “Azad gənclik” hərəkatının rəhbəri Ülvi Həsənli və NİDA hərəkatının fəalı Emil Bağırov metronun “Nizami” stansiyasının çıxışında saxlanılıblar. Onları yaxınlıqdakı  Bakı metropoliteni Polis İdarəsinə aparıblar. Özlərini polis kimi təqdim edən mülki geyimli şəxslər gənclərə bildiriblər ki, onlar özlərini “şübhəli aparırlar”, “ora-bura gedirlər”.

Həmçinin NİDA vətəndaş hərəkatının İdarə Heyətinin üzvü Kənan Qasımlı və “Azad gənclik” hərəkatının fəalı Məcid Mərcanlı da  Bakı metropoliteninin Polis İdarəsinə çağırılıblar. 

M.Mərcanlı polisə getməzdən əvvəl jurnalistlərə bildirib ki,  Ü.Həsənli idarədən ona telefon edərək bildirib ki, saxlanma “metroda yapışdırılan vərəqələrlə” bağlıdır.

E.Bağırovu buraxıblar. Qalan üç nəfər naməlum istiqamətə aparılıb. Gənclərin yoldaşları güman edirlər ki, onları məhkəməyə aparıblar. Lakin nə Yasamal, nə də Səbayel məhkəmələrində olmayıblar.

14 iyul saat 22.00-a qədər gənclərin taleyi məlum olmayıb.

Qeyd edək ki, son günlər Bakıda və Xırdalanda anonim vərəqələr paylanılır. Vərəqələrdə “Hakimiyyətdən qorxma!”, “Hakimiyyətə etiraz et!”, “Hakimiyyəti dəyiş!”” sözləri yazılıb. Bu şüarların yanında böyük nida işarəsi qoyulub. —06B-