Gülər Əhmədova Əvəz Zeynallının məhkəməsinə çağrılacaq

Bakı Ağır Cinayətlər Məhkəməsində “Xural” qəzetinin baş redaktoru  Əvəz Zeynallı ilə bağlı növbəti proses keçirilib. Hakim Ramella Allahverdiyevanın sədrliyi ilə keçirilən prosesdə Nərimanov rayon icra şöbəsindən sonuncu şahid Fuad Nəbiyev ifadə verib. Əvəz Zeynallı ilə bağlı heç bir işin onun icraatında olmadığını deyən Nəbiyev həmin işlərlə 2010-cu ilin dekabrında 12 gün şöbə rəisini müvəqqəti əvəz edərkən tanış olduğunu bildirib.  Şahid ona verilən bütün suallara “xatırlamıram” deyə cavab verib. 

Növbəti şahidlər prosesə gəlmədiyindən hakim deputat Gülər Əhmədova istisna olmaqla bütün şahidlərin məhkəməyə məcburi gətirilməsi haqda qərar qəbul edib. Gülər Əhmədova ilə bağlı istisna onun deputat olması ilə əlaqələndirilib. Amma hakim deputatın məhkəməyə çağrılacağını bildirib.

Daha sonra Əvəz Zeynallının əvvəlki proseslərdə verdiyi vəsatətlər müzakirə olunub və onların təmin edilməməsi ilə bağlı qərar çıxarılıb.

Prosesin yekununda Əvəz Zeynallının həbsinin ev dustaqlığı və ya girov qətimkan tədbiri  ilə əvəz olunması barədə vəsatətinə baxılıb. Müşavirədən sonra hakim vəsatətin təmin edilmədiyini və növbəti prosesin 27 sentyabr saat 14:00-a təyin edildiyini bildirib.

Xatırladaq ki Əvəz Zeynallı Cinayət Məcəlləsinin 311.3.3 (külli miqdarda rüşvət alma) və 311.3.4-cü (hədə-qorxu tətbiq olunmaqla rüşvət alma) maddələri ilə ittiham edilir. -0-