Siyasi partiyalar və siyasətçilər "Gülərqeyt" haqda

Ölkənin siyasi qurumları və siyasətçiləri deputat Gülər Əhmədovanın fəaliyyəti dayandırılmış Azərbaycan Beynəlxalq Universitetinin rektoru Elşad Abdullayevin deputat olması ilə bağlı apardığı danışıqlara münasibət bildiriblər.  

Müsavat Partiyası bəyanat yayaraq, deputat G.Əhmədovanın sosial şəbəkələrdə və elektron KİV-lərdə fəaliyyəti dayandırılmış ABU rektoru E.Abdullayevlə rüşvət müqabilində parlamentə düşəcəyinə dair yayılan video görüntülərin cəmiyyətdə şok yaratdığını iddia edir. Deputat G.Əhmədova küllü miqdarda pul müqabilində deputat seçilmək üçün E.Abdullayevin adının prezident aparatının hazırladığı siyahıya salınacağı vədi verir. Bu videogörüntülər ölkə parlamentinə seçkilərin saxta keçirilməsi, namizədlərin siyahısının seçkidən öncə ali icra hakimiyyətində hazırlanması, iqtidara sərf edən adamların parlamentə xalq seçimindən kənar düşməsinin göstəricisi adlandırılır. “Bu müxalifət qüvvələrinin mövqeyinin həqiqət olduğunu, korrupsiya və rüşvətxorluğun ölkənin təkcə iqtisadi həyatını yox, siyasi idarəçilik sistemini də bürüdüyünü göstərir”, - deyə fakta münasibət ifadə edilir.

Sənəddə hakimiyyətdən parlamentin buraxılması, parlamentə azad, ədalətli seçkilər keçirilməsi tələb edilir.  

Demokrat Partiyasının sədri Sərdar Cəlaloğlu deputatların bir qisminin parlamentə siyasi baxımdan düşdüyünü, qalanlarının isə korrupsiya vasitəsilə “seçildiyini” deyib. O, hər seçkidən öncə belə alverlərin getdiyini, bu haqda siyasi partiyalarda informasiya olduğunu qeyd edir. “Amma bu video net faktdır və bununla bağlı cinayət işi qaldırılmalıdır”, - deyə ADP sədri fakta münasibət ifadə edib. S.Cəlaloğlu parlamentə düşən rektorları, iş adamlarını “korrupsiya mənbəyi” adlandırıb. Onların parlamentə “Gülərin metodu” ilə düşdüklərini söyləyib. O, belə faktların araşdırılmasının vacibliyini vurğulayıb. “Bu təkcə icra hakimiyyətinin yox, həm də qanunvericilik orqanının korrupsiya və rüşvətə bulaşmasıdır, belə qanunverici orqan cəmiyyətə sağlamlaşdırıcı impuls verə bilməz”, - deyə mövcud parlamentin yararsızlığını nəzərə çatdırıb. S.Cəlaloğlu ölkəni beynəlxalq qurumlarda təmsil edən deputat Səməd Seyidovun rektoru olduğu universitetin korrupsiyada ittiham olunmasını qeyd edərək, digər rektor və universitetlərin bundan da bərbad halda olması mövqeyi ifadə edib. “Belə faktlar dövlətçiliyin nə günə qoyulmasının, hansı təhlükə ilə üz-üzə qalmasının göstəricisidir”, - deyə ADP sədri ümumiləşdirici mövqe nümayiş etdirib.

Demokratik İslahatlar Partiyasının sədri deputat Asim Mollazadə, “Ana Vətən” partiyasının sədri deputat Fəzail Ağamalı, “Ümid” Partiyasının sədri İqbal Ağazadə bu məsələdə əsas rolu hüquq-mühafizə orqanlarının üzərinə yıxaraq, bu orqanların araşdırma aparmalı olduqlarını və ondan sonra münasibət bildirməyin münasib olduğunu ifadə ediblər.

Parlamentdə özünü müxalifət kimi təqdim edən Bütöv Azərbaycan Xalq Cəbhəsi və “Qurtuluş” partiyalarının sədrləri Qüdrət Həsənquluyev və Fazil Qəzənfəroğlunun telefonları söndürülmüş olduğu üçün zənglərə cavab verməyib. -05B-