Gülər Əhmədovanın həbs müddəti üç ay uzadılıb

Ötən gün Səbayel Rayon Məhkəməsində sabiq millət vəkili Gülər Əhmədovanın həbs müddətinin 3 ay uzadılması barədə qərar qəbul edilib. Vəkil Raqif Mustafayevin Turan-a verdiyi məlumata görə, qərar ibtidai istintaqın məhkəməyə verdiyi təqdimat əsasında çıxarılıb.

Belə ki,  istintaq hesab edir ki, G.Əhmədovanın işi üzrə bir sıra prosessual hərəkətlər, ekspert rəyləri, şahid ifadələri alınmayıb. 

Vəkil istintaqla razılaşmayaraq indiyədək  istintaq hərəkətlərinin aparılmamasını əsas gətirib.

Məhkəmədə iştirak edən G. Əhmədova da qərarla razılaşmayaraq etiraz edib.

Vəkil həmçinin bildirib ki, G. Əhmədovanın barəsində seçilmiş həbs qətimkan tədbirinin ev dustaqlığı ilə əvəz olunması barədə vəsatət qaldırılsa da, vəsatət təmin olunmayıb. R.Mustafayev apellyasiya şikayəti verəcəyini də istisna etməyib.

G.Əhmədovanın səhhətinə gəlincə, vəkil bildirib ki, onun Ədliyyə Nazirliyinin müalicə müəssisəsinə köçürülməsi barədə müraciət etsə də nəticə olmayıb. “Hamı kiminsə göstərişini gözləyir”, - R.Mustafayev  vurğulayıb.

G.Əhmədova bu il fevralın 13-də saxlanılıb. Həmin gün Səbayel Rayon Məhkəməsi onun  barəsində 3 aylıq həbs qərarı çıxarıb. O, Cinayət Məcəlləsinin 178.3.2 (dələduzluq) və 307.2 (qabaqcadan vəd etmədən cinayəti gizlətmə) maddələri ilə ittiham olunur. G. Əhmədovanın adı 2012-ci il sentyabrın 25-də Beynəlxalq Universitetin sabiq rektoru, Fransada mühacirətdə olan Elşad Abdullayevin rüşvətlə deputat mandatının alınmasından bəhs edən video qalmaqalında əsas fiqurlardan biri kimi hallanır.  -16B-