Gürcüstan patriarxı Azərbaycan prezidenti ilə görüşüb

Cümə günü bütün Gürcüstanın katolikos-patriarxı II İliya Azərbaycan prezidenti İlham Əliyevlə görüşüb və onun qarşısında bir neçə məsələ qaldırıb, georgianpress.ru məlumat verib.

Əsasən David Qareci monastır kompleksi və gürcü yepiskopun Azərbaycanda fəaliyyətilə bağlı məsələ qaldırılıb.

II İliya Azərbaycan prezidentini və nümayəndə heyətinin üzvlərini salamlayıb, onlara Gürcüstana, əsasən Patriarxlığa səfərə görə təşəkkür edib.

Patriarx qeyd edib ki, Gürcüstanla Azərbaycanı qədim qardaşlıq telləri bağlayır, şəxsən onun Azərbaycanın keçmiş prezidenti Heydər Əliyevlə yaxın münasibətləri olub.

“Biz Qafqazda sülhü qorumaq üçün hər şey edirik. Sizin böyük təcrübəniz var. Ümid edirəm ki, bizim xalqlarımız  əmin-amanlıq içində yaşayacaqlar. Qeyd etmək istəyirəm ki, bizim dinlərimiz arasında da yaxşı münasibətlər var. Bizim şeyx Allahşükür Paşazadə ilə dostluq münasibətlərimiz var”, - patriarx vurğulayıb.

O deyib ki, Gürcüstanda müsəlmanlar Azərbaycanda olduğundan pis yaşamırlar. Gürcüstanda 300-dən çox məscid var. Odur ki, Azərbaycandakı xristianların da durumu buradakı müsəlmanların durumu ilə eyni olmalıdır.

“Lakin təbii ki, həlli tələb olunan məsələlər var. Məsələn, Rusiyanın öz yepiskopu var (Azərbaycanda). Yaxşı olardı ki, Gürcüstanın da öz yepiskopu olsun.   Saqarecodakı monastır kompleksi böyük əhəmiyyət daşıyır. David Qareci monastır kompleksinin üç monastırı Azərbaycan ərazisində yerləşir. Bu məsələni həll etmək olar. Biz Qafqazda sülhün olması üçün hər şeyi edirik, lakin hər zaman belə olmur.  Biz Gürcüstanın və Azərbaycanın ərazi bütövlüyünün pozulmasından narahatıq və ümid edirik ki, bu ölkələrin ərazi bütövlüyü bərpa olunacaq”, - patriarx vurğulayıb.

O,  SOCAR şirkətinin sayəsində bütün dini nümayəndəliklərin pulsuz təbii qaz aldıqlarını bildirib və buna görə Azərbaycan prezidentinə təşəkkür edib. Həmçinin ümidvar olduğunu bildirib ki, əlaqələr bundan sonra da inkişaf edəcək.