Hərbi Əsirlər, Girovlar, İtkin Düşənlər üzrə Dövlət Komissiyasının iclası

Bakı/01.11.18/Turan: Hazırda 871 nəfər Azərbaycan vətəndaşı Ermənistanda əsir və girov saxlanılır. Bu barədə Dövlət Təhlükəsizlik Xidmətinin rəhbəri və Hərbi Əsirlər, Girovlar, İtkin Düşənlər üzrə Dövlət Komissiyasının sədri Mədət Quliyev noyabrın 1-də komissiyanın iclasında bildirib.

Onun sözlərinə görə, Azərbaycan həmin şəxslərin azad edilməsi üçün zəruri tədbirləri davam etdirir və onların azad edilməsi məsələsi ölkə rəhbərliyinin daim diqqət mərkəzindədir.

M.Quliyev deyib ki, Hərbi Əsirlər, Girovlar, İtkin Düşənlər üzrə Dövlət Komissiyası Beynəlxalq Qırmızı Xaç Komitəsi tərəfindən qeydiyyata alınmış əsir və girovların azad edilərək tərəflərə verilməsi barədə təklif irəli sürüb. Lakin Ermənistan bu təklifə öz münasibətini bildirməyib.

Qeyd edək ki, erməni tərəfi öz ərazisində əsir və girovların olmasını inkar edərək onların hərbi əməliyyatlar zamanı həlak olduqlarını bildirir.-02D-