Hüquq Müdafiə Təşkilatlarının Monitorinq Qrupu islamçıları siyasi məhbus hesab etmir

Çərşənbə axşamı İnsan Hüquqları Monitorinq qrupu AŞPA-nın yay sessiyasında iştiraklarının yekununa dair mətbuat konfransı keçirib.

    Hüquq müdafiəçisi Səidə Qocamanlı bu sessiyada Azərbaycanla bağlı əsəbilik yaşandığını, sessiyanın Azərbaycan üçün ağır olduğunu nəzərə çatdırıb.  

    AŞPA-nın Azərbaycanda siyasi məhbuslar üzrə məruzəçisi Kristofer Ştrasserin hesabatına hüquq müdafiəçiləri birmənalı yanaşmayıblar. Məruzəçinin siyahısında 89 nəfər siyasi məhbusun olması etibarlı sayılmayıb. Belə ki, siyahıda adları olanlardan 17 nəfərin artıq azadlığa buraxıldığı deyilib. 

    1994-cü ilin martında Bakı metrosunda törədilmiş terakta görə həbs edilənlərin siyahıda siyasi məhbus kimi qeydə alınmaları bəyənilməyib. Eyni zamanda məhkəmə prosesi başa çatmamış şəxslərin adlarının siyahıda olması siyasi məhbus haqqında kriteriyaların pozulması hesab edilib. Hüquq müdafiəçiləri siyasi məhbus məsələsini ölkə içində həll edə bilmək üçün iqtidara tıəklif də veriblər. Belə ki, 2003-2005-ci illərdə hüquq mühafizə orqanları, vətəndaş cəmiyyəti institutları təmsilçilərindən ibarət işçi qrupun fəaliyyətinin bərpası önə çəkilib. 

    Monitorinq qrupunun siyahısında 10 siyasi məhbusun adı var. Onların 4-ü Əli İnsanov, Vidadi İsgəndərov, Fərhad Əliyev və Telman Əliyev ağır xəstələr siyahısındadır. 

    Monitorinq qrupu həbsdə olan şərti “Səid Dadaşbəyli dəstəsi”ni, hicabı müdafiəyə görə həbs edilən islamçıları, İslam Partiyasının üzvlərini siyasi məhbuslar saymasa da ədalətli məhkəmə araşdırmasından məhrum olunmuşlar hesab edir. Bu adamlara münasibətdə aşıq məhkəmə prosesinin keçirilməsini təklif  edirlər. Hüquq müdafiəçiləri AŞPA-nın sessiyasında onların barələrində yayılan islamçıların azad olunmasının əleyhinə olmaları haqda xəbərləri birmənalı rədd ediblər. 

    Avropa Şurasındakı görüşlərdə təkcə siyasi məhbuslar haqda yox, söz, ifadə,  mətbuat, sərbəst toplaşma azadlıqlarının, mülkiyyət hüquqlarının pozulması, ədalətsiz məhkəmələr haqda danışılıb.

     Gələn il keçiriləcək prezident seçkiləri Azərbaycanın dünyada taleyini həll edəcək addım adlandırılıb. Seçkilərin demokratik keçirilməsinin, Azərbaycanın 2001-ci ildə AŞ-yə üzv olarkən üzərinə götürdüyü öhdəlikləri tam şəkildə yerinə yetirməsinin vacibliyi vurğulanıb. Monitorinq qrupu prezidenrt seçkilərinin demokratik keirilməsini təmin etmək üçün Seçki Məcəlləsinin demokratikləşməsi yönündə fəaliyyətə başlayacaqlarını bildiriblər. -05C-