IBAHRI vəkil Şəhla Hümbətovanın müdafiəsilə bağlı müraciət edib  

Bakı/31.12.19/Turan: Beynəlxalq Vəkillər Kollegiyası Assosiasiyasının İnsan Haqları İnstitutu (IBAHRI) tanınmış azərbaycanlı vəkil Şəhla Hümbətovanın işdən kənarlaşdırılmasını pisləyib.

İBAHRI 4 beynəlxalq insan hüquqları təşkilatı -Civil Rights Defenders (Vətəndaş Hüquqları Müdafiəsi), Freedom House, The International Partnership for Human Rights (İnsan Hüquqları naminə Beynəlxalq Tərəfdaşlıq) və Lawyers for Lawyers (Vəkillər vəkillər üçün) təşkilatı ilə birlikdə Azərbaycan Vəkillər  Kollegiyası (AVK) Rəyasət Heyətinə müraciət edib. Müraciətdə “insan hüquqları üzrə vəkil Şəhla Hümbətovaya qarşı qeyri-adekvat intizam tədbirləri pislənilib.

Dekabrın 30-da qəbul edilmiş müraciətdə AVK Ş.Hümbətova və özbaşına əsaslarla işdən kənarlaşdırılmış digər vəkil-hüquq müdafiəçilərinin lisenziyalarını bərpa etməyə çağırılıb.

Müraciət müəllifləri hesab edirlər ki, Ş.Hümbətovanın kənarlaşdırılması bir daha göstərir ki, AVK Rəyasət Heyəti “Azərbaycanda vəkillik fəaliyyətini sistematik şəkildə pozur” və ölkə vətəndaşlarını hüquqları pozulduğu halda effektiv hüquqi müdafiəyə çıxış imkanlarından məhrum edir. 

Ş.Hümbətova çoxsaylı azərbaycanlı siyasi məhbusu müdafiə edib və hazırda “Gəncə işi” üzrə  bir neçə müttəhimi müdafiə edir. Onun müdafiə etdiyi şəxslərin amansız işgəncələr, məcburi etiraflar və uydurma dəlillər barədə məlumatları geniş diqqəti cəlb edib, beynəlxalq hüquq müdafiəçiləri qeyd edirlər.

Bu ilin əvvəlində AVK Ş.Hümbətovanı intizam məsuliyyəti ilə hədələyib. Buna 2019-cu ilin yanvarında o zamankı siyasi məhbus və bloger Mehman Hüseynovun aclıq elan etdiyini və vəziyyətinin pis olduğunu açıqladıqdan sonra Azərbaycan Penitensiar Xidməti  “yalan məlumat yaydığına” görə Ş.Hümbətovadan şikayət etməsi səbəb olmuşdu.

Ş.Hümbətovanın lisenziyasının dayandırılması qərarı və onun işdən çıxarılmasına nail olmaq   o deməkdir ki, Ş.Hümbətova vəkil kimi öz işini icra edə bilməyəcək. 2018-ci ilin yanvar ayında qüvvəyə minən Azərbaycan qanunvericiliyinə  bir sıra düzəlişlərə əsasən Vəkillər Kollegiyasının üzvü olmayan hüquqşünasların məhkəmə proseslərinə çıxmasına icazə verilmir.

“Bir sıra vəkil-hüquq müdafiəçisnin, o cümlədən İradə Cavadova, Yalçın İmanov, Əlaif Həsənov və Xalid Bağırovun  işdən kənarlaşdırılması AVK-nın müstəqil olmaması və fəaliyyətinə dövlətin yersiz təsiri ilə bağlı ciddi narahatlığa səbəb olur. Hər yeni işdən çıxarılma, kənarlaşdırma və ya töhmət hüquq-müdafiə işi ilə məşğul olan Vəkillər Kollegiyasının istənilən üzvü üçün xəbərdarlıq rolunu oynayır”, -beynəlxalq hüquq-müdafiə qurumlarının AVK-ya müraciətində deyilir. 

Müraciəti imzalayan təşkilatlar AVK-nı Ş.Hümbətovanın və özbaşına səbəblərlə işdən kənarlaşdırılan digər vəkil-hüquq müdafiəçilərinin lisenziyasını bərpa etməyə və “Azərbaycanda vəkilliyin müstəqilliyini pozmağa yox,  qorumağa” çağırırlar.

“Biz həmçinin Azərbaycan hökumətini vəkilliyin müdafiəsi ilə bağlı beynəlxalq standartlara, o cümlədən Mülki və Siyasi Hüquqlar haqqında Beynəlxalq Pakta, Avropa İnsan Hüquqları Konvensiyasına və BMT-nin vəkillərin rolu haqqında əsas prinsiplərinə əməl etməyə çağırırıq”, - sənəddə vurğulanır. -06В-