İctimaiyyət hökuməti Azərbaycanın işğal edilmiş ərazilərində məskunlaşma probleminin BMT səviyyəsinə çıxarılmasına çağırır

  “Qarabağ: İşğal edilmiş ərazilərdə qanunsuz məskunlaşma məsələləri”nə həsr olunan “dəyirmi masa”nın iştirakçıları qəbul etdikləri müraciətdə Azərbaycan hökumətini Ermənistan tərəfindən işğal edilmiş ərazilərin gələcəkdə məskunlaşdırılmasının qarşısının alınması  üçün tədbirlər görməyə çağırıblar. 

Dörd bənddən ibarət müraciətdə aşağıdakılar tələb olunur:

1. ATƏT-in Minsk Qrupunun iki qiymətləndirmə  missiyasının hesabatlarının keyfiyyətsiz olmasından irəli gələrək işğal edilmiş ərazilərin məskunlaşdırılması ilə bağlı vəziyyətin qiymətləndirilməsi MQ-nin inhisarından çıxarılsın və BMT Baş Assambleyasının faktların toplanması üzrə missiyasına verilsin və sonradan faktların müzakirəsi BMT Təhlükəsizlik Şurasına çıxarılsın.

2. Avropa Şurası çərçivəsində qiymətləndirmə missiyasının yaradılmasına təşəbbüs göstərilsin. Belə ki, missiya qanunsuz məskunlaşdırmanın araşdırılması ilə yanaşı mülki obyektlərin, dağılmış evlərin, müəssisələrin vəziyyətini araşdıra və  reyestr yarada bilər.

3.Azərbaycan nümayəndələri missiyaya daxil edilsin;

4.ATƏT-in Ninsk Qrupunun həmsədrləri ilə görüşlər zamanı işğal edilmiş ərazilərin məskunlaşdırılması məsələsinə diqqət yetirilsin.

Düşüncə Mərkəzinin təşkil etdiyi “dəyirmi masa”da qeyd olunub ki, 2005 və 2011-ci illərdə missiyaların qiymətləndirilməsinə baxmayaraq, Ermənistan işğal edilmiş ərazilərin məskunlaşdırılması siyasətini davam etdirir. ATƏT missiyası müxtəlif vaxtlarda işğal edilmiş ərazilərdə 14 mindən 17 minədək adamın yerləşdirilməsini aşkar edib. Azərbaycan tərəfi bu rəqəmin 23 min olduğunu bildirir.

İşğal edilmiş ərazilər haqda 1949-cu il 12 avqust tarixli Dördüncü Cenevrə Konvensiyasına hökumətin məhəl qoymamasından təəccüb ifadə olunub.

Dağlıq Qarabağda vilayətin adının Arsax ilə dəyişdirilməsi ilə bağlı referendum keçirilməsi tənqid olunub. Bu, regionda gərginliyin artması kimi qiymətləndirlib.

“Hökumət bu destruktiv prosesin qarşısının alınması üçün təxirəsalınmaz tədbirlər görməlidir”, - Düşüncə Mərkəzinin rəhbəri İsa Qəmbər bildirib.

Müzakirələr başa çatdıqdan sonra Xocalı faciəsinin qurbanlarının xatirəsi anılıb.

Tədbirdə alimlər, ekspertlər, siaysətçilər iştirak ediblər.—0—