İ.Əliyev: Böyük qonşu "böyük bazardır"

Bakı/23.01.18/Turan: İ.Əliyev Azərbaycanın özünü əsl müstəqil ölkə kimi təsdiq etdiyini, müstəqil xarici siyasət formalaşdıra bildiyini söləyib.

Dövlət başçısı deyib ki, bu xarici siyasət milli maraqlara uyğun və qonşuların maraqlarına zidd deyil.

"Hesab edirəm ki, qonşularının əksəriyyətindən kiçik ölkə üçün belə bir uyğun balansı tapmaq və bu qonşuluqdan fayda əldə etmək çox vacibdir".

İ.Əliyev "böyük qonşunu "böyük bazar" kimi dəyərləndirib və qonşuları Azərbaycan üçün "ən yaxşı bazar" adlandırıb: "Təbii ki, bir-birimizin daxili işinə qarışmırıq. Qonşular ilə əməkdaşlıqda praqmatik və praktik yanaşma ölkəmizin uğurunun, daxili stabilliyinin və gələcək üçün yaxşı perspektivin əsas səbəbidir".

"Neftin qiyməti düşəndə Azərbaycanda elan etdim ki, artıq postneft dövrü başladı, biz neft və qazı unutmalıyıq. Mövcud neft-qaz layihələrini davam etməliyik, lakin əsas gəlir kimi texnologiya, innovasiya, sənaye, sahibkarlıq, kənd təsərrüfatına diqqətə yetirməliyik". Azərbaycan prezidenti İlham Əliyev Davos Dünya iqtisadi Forumu çərçivəsində "Strateji perspektivlər: Avrasiya" adlı panel müzakirələrində deyib.

İ.Əliyev İqtisadiyyatın diversifikasiyasının əsas məqsəd olduğunu, bu istiqamətdə yaxşı uğurlar əldə edildiyini bildirib.

Dövlət başçısı bu sahədə yaxşı nəticələr əldə edildiyini, qeyri-neft iqtisadiyyatı və sənayesində artım olduğunu bildirib. Dövlət başçısı neftin qiymətinin ancaq ehtiyatların artırılması vasitəsi kimi dəyərləndirib.

İ.Əliyev enerji layihələrinin region üçün çox vacib olduğunu və bu layihələrin regionun enerji xəritəsini dəyişdiyini vurğulayıb.

Dövlət başçısı karbohidrogenlərin ixrac yollarını diversifikasiya etməklə tərəfdaşların enerji təhlükəsizliyinin təmin edildiyini vurğulayıb: "Azərbaycan Avropa İttifaqının bəzi ölkələri üçün artıq neft təminatçısıdır. Cənubi Qaz Dəhlizi layihəsini bitirdikdən sonra Avropa ölkələri bizim təbii qazımıza da çıxış əldə edəcəklər", - deyə o vurğulayıb.

Ölkə daxili duruma toxunan İ.Əliyev Azərbaycanda daxili təhdidlər və risklər olmadığını söyləyib, bununla birgə, Azərbaycanın sərhədlərində də təhlükəsizliyi təmin etməli olduğunu nəzərə çatdırıb.

İ.Əliyev Azərbaycanın özünü əsl müstəqil ölkə kimi təsdiq etdiyini, müstəqil xarici siyasət formalaşdıra bildiyini söləyib. Dövlət başçısı deyib ki, bu xarici siyasət milli maraqlara uyğun və qonşuların maraqlarına zidd deyil. -05B-