Bakıda Almaniya ilə siyasi məsləhətləşmələr

Bakı/23.01.18/Turan: "Almaniyanın Ermənistan-Azərbaycan münaqişəsi ilə bağlı mövqeyi birmənalıdır, münaqişənin Helsinki Yekun Aktının prinsipləri əsasında həllini dəstəkləyir".

Azərbaycan və Almaniya arasında xarici işlər nazirlikləri səviyyəsində Bakıda keçirilən siyasi məsləhətləşmələrdə Almaniyanın XİN-nin Şərqi Avropa, Qafqaz və Mərkəzi Asiya üzrə müvəkkili Andreas Peşke belə deyib.

Bu haqda Azərbaycan XİN-in press-relizində bildirilir. Müzakirələrdə Azərbaycanı xarici işlər nazirinin müavini Xələf Xələfov təmsil edib.

X.Xələfov ikitərəfli iqtisadi və mədəni əlaqələrin səviyyəsindən məmnunluq ifadə edib. O, Dağlıq Qarabağ münaqişəsinə toxunarkən, Almaniya hökumətinin separatçı rejimin nümayəndələrinə viza verilməməsi ilə bağlı qərarını yada salıb. Deyib ki, bu, Almaniyanın münaqişənin həlli prosesinə və Azərbaycanın ərazi bütövlüyünə dəstəyi kimi yüksək qiymətləndirir.

A.Peşke isə öz növbəsində Almaniyanın ATƏT-ə sədrliyi dövründə münaqişənin həllində irəliləyişə nail olunması istiqamətində səylər göstərdiyini bildirib. O, 2018-ci ilin Azərbaycanda alman məskənlərinin salınmasının 200 illiyi ilə əlamətdar olduğunu bildirərək, bu çərçivədə müxtəlif mədəni tədbirlərin keçirilməsinin planlaşdırıldığını bildirib.

Görüşdə Azərbaycanla Avropa İttifaqı arasında münasibətlərin cari vəziyyətinin, readmissiya, miqrasiya məsələlərin də diqqət mərkəzində olduğu biuldirilir.--0--