İİB Azərbaycan-2030 proqramıilə maraqlanır

Bakı/26.02.23/Turan: Prezident İlham Əliyev fevralın 26-da İslam İnkişaf Bankının prezidenti Məhəmməd Süleyman əl-Cassiri qəbul edib.

Görüş zamanı Əliyev gələcək əməkdaşlıq formatının həm regional səviyyədə inkişaf prosesləri, həm də "Azərbaycan 2030: sosial-iqtisadi inkişafın milli prioritetləri" baxımından müəyyənləşdirilməsinin vacibliyini vurğulayıb.

Prezident qeyd edib ki, bununla bağlı Qarabağ və Şərqi Zəngəzurda yenidənqurma layihələri prioritet istiqamətlərdən biridir.

O, Şərq-Qərb nəqliyyat dəhlizinin, rəqəmsal transformasiya və bərpa olunan enerji mənbələrinin də Azərbaycanın iqtisadi inkişafında mühüm rol oynadığını, həyata keçirilən layihələrə xeyli sayda tərəfdaş və investorun cəlb olunduğunu və cəlb olunacağını bildirib.

İİB prezidenti bankın "Azərbaycan 2030: sosial-iqtisadi inkişafın milli prioritetləri" çərçivəsində perspektiv layihələrdə maraqlı olduğunu bildirib, gələcəkdə ticarət və investisiya sahəsində əməkdaşlığın həyata keçirilməsinin mümkün olduğunu vuruğlayıb.

O qeyd edib ki, Azərbaycanın müxtəlif sahələrdə, o cümlədən "Elektron Hökumət" sahəsində qazandığı uğurlu təcrübə bank tərəfindən digər ölkələrdə də tətbiq oluna bilər.

İİB rəhbərinin məşvərət səfəri martın 3-dək davam edəcək. O, Nazirlər Kabinetində danışıqlar aparacaq, tərəfdaşlıq münasibətlərinin dərinləşməsi üçün Azərbaycanın iri şirkətlərinin rəhbərləri ilə görüşəcək.

"Strateji səfər İİB qrupu ilə Azərbaycan arasında əməkdaşlığı maksimum dərəcədə artırmaq, potensial əməkdaşlıq sahələrini genişləndirmək və ölkənin sosial-iqtisadi inkişafına töhfə verəcək hərəkətləri stimullaşdırmaq məqsədi daşıyır",  bankın məlumatında deyilir.

İİB Azərbaycanla 1992-ci ildən əməkdaşlıq edir və indiyədək layihələrin maliyyələşdirilməsinə 1,2 milyard dollara yaxın vəsait ayırıb.

"Azərbaycan 2030: sosial-iqtisadi inkişafın milli prioritetləri" proqramı 2 fevral 2021-ci ildə təsdiq edilib

О 5 əsas istiqaməti əhatə edir:

iqtisadiyyatın davamlı artırılması  və rəqabət qabiliyyətinin təmin edilməsi;

dinamik, sosial ədalətə əsaslanan inklüziv cəmiyyətin yaradılması;

rəqabətli insan kapitalı və müasir innovasiya;

azad edilmiş ərazilərə Böyük Qayıdış;

təmiz mühit və "yaşıl inkişaf" ölkəsi.—0—