İlham Əliyev Trampı Qüdslə bağlı qərarına yenidən baxmağa çağırıb

Bakı/13.12.17/Turan: Azərbaycan prezidenti İlham Əliyev ABŞ prezidenti Donald Trampın beynəlxalq hüquq normalarına və BMT TŞ-nin qətnamələrinə "zidd olan" Qüdsün İsrailin paytaxtı kimi tanınması və Avropa dövlətinin səfirliyinin bu şəhərə köçürülməsi haqqında qərarından böyük "narahatlığını" bildirib.

"Bu qərar Fələstin-İsrail münaqişəsinin ədalətli və hərtərəfli nizama salınması işinə mənfi təsir edə, Yaxın Şərqdə təhlükəli fəsadlara gətirib çıxara bilər. Hesab edirik ki, Amerika Birləşmiş Ştatları bu qərara yenidən baxmalıdır", deyə dövlət başçısı bu gün İslam Əməkdaşlıq Təşkilatına üzv dövlət başçılarının fövqəladə sammitində bildirib.

Azərbaycan ardıcıl olaraq Fələstin-İsrail münaqişəsinin sülh yolu ilə, Şərqi Qüdsün Fələstin Dövlətinin paytaxtı olmaqla iki dövlət prinsipi əsasında həllini dəstəkləyir. Bir neçə il bundan əvvəl Azərbaycan Fələstin Dövlətinə yardım məqsədilə İslam Maliyyə Təhlükəsizlik Şəbəkəsinin təsis konfransına və Qüds şəhərinin inkişafına dəstək məqsədilə donor konfransına ev sahibliyi edib.

2017-ci ilin iyul ayında Azərbaycanda BMT-nin Fələstin xalqının ayrılmaz hüquqlarının həyata keçirilməsinə dair komitənin, BMT-nin humanitar məsələlər üzə əlaqələndirmə ofisinin, İƏT və müxtəlif qeyri-hökumət və vətəndaş cəmiyyəti təşkilatlarının iştirakı ilə Qüds məsələsinə dair beynəlxalq konfrans keçirilib. Konfransda Şərqi Qüdsün işğalı və Əl-Aqsa məscidində ibadət edənlərə qarşı tətbiq olunan məhdudiyyətləri qınayan bəyanat qəbul edilib, deyə o sözünə davam edib.

"Biz hər zaman olduğu kimi, bu gün də Fələstin xalqının yanındayıq", deyə Əliyev qeyd edib.

O, Azərbaycanın islam həmrəyliyinə sadiq olduğunu bildirib.

O, həmçinin Qarabağ münaqişəsinə toxunaraq, Dağlıq Qarabağ və onun ətrafındakı yeddi rayonu işğal edən, işğal edilmiş ərazilərdə etnik təmizləmələr aparan, məscidləri və digər islam abidələrini məhv edən Ermənistanın bir sıra müsəlman ölkələr ilə dostluq münasibətləri qurmağa çalışdığını xatırladıb.

"Bu, ən böyük riyakarlıqdır. Dünya müsəlmanları bilməlidirlər ki, müqəddəs məscidlərimizi dağıdan Ermənistan müsəlman ölkələrinin dostu ola bilməz", deyə Əliyev bildirib.

O, Ermənistanın BMT TŞ-nin erməni silahlı qüvvələrinin Azərbaycan ərazilərindən çıxarılmasını tələb edən dörd qətnaməsini yerinə yetirməkdən imtina etdiyini xatırladıb.

"Azərbaycan heç vaxt erməni işğalı ilə barışmayacaq, münaqişənin həlli yalnız və yalnız Azərbaycanın tanınmış beynəlxalq sərhədləri, ərazi bütövlüyü çərçivəsində həll olunmalıdır", deyə Əliyev bildirib. -06D-