İlqar Vəlizadə: “Paşinyan razılaşmaların ləğvi üçün sülh prosesini imitasiya edir”

Bakı/12.11.22/Turan: Ermənistanın baş naziri Nikol Paşinyan prezident İlham Əliyevin Şuşada verdiyi bəyanata cavab verib. Əliyev deyib ki, Ermənistanla sülh müqaviləsi Azərbaycanın prinsipləri əsasında imzalanacaq, ya da heç imzalanmayacaq.

Noyabrın 11-də Paşinyan Ermənistan İctimai Televiziyasında çıxışı zamanı bir neçə əsas tezis səsləndirib: Əliyev artıq Naxçıvana  yolun “dəhliz statusu”na israr etmir, bütün dünya Qarabağı Azərbaycanın hesab edir.

“İllüziyalara qapılmaq lazım deyil…biz bütün dünyaya qarşı təkbaşına mübarizə aparmamalıyıq və apara bilmərik. Öz etdiklərimizlə qarşı-qarşıya durmalıyıq. Nəticədə problemi necə həll edəcəyimizlə bağlı aydın, həyata keçirilə bilən proqrama malik olmalıyıq. Nə qədər ağrılı və çətin olsa da, biz bu reallıqla üzləşməliyik”.

Paşinyan onu da deyib ki, Ermənistan hakimiyyəti Qarabağ məsələsinin həllinə qarşı deyil, lakin bu qərarı orada yaşayan adamlar qəbul etməlidirlər. Paşinyan Rusiya sülhməramlılarının Qarabağda qalma müddətinin uzadılmasına dair sənədi imzalamağa hazırdır.

Paşinyanın ziddiyyətli bəyanatını Turan-a şərh edən politoloq İlqar Vəlizadə Ermənistan rəhbərinin ilin sonuna qədər Azərbaycanla sülh müqaviləsinin imzalanması üçün hər şeyi edəcəyi barədə dediyi sözlər üzərində dayanmağı vacib sayır. Paşinyan sülh sazişinin bir neçə variantının olduğunu bildirir. Bu variantlardan biri bütün mümkün məsələləri konkretləşdirmədən Ermənistan-Azərbaycan münasibətlərinin ümumi sərhədlərini müəyyən edəcək hansısa çərçivə sazişi ola bilər.

"Nəzərdə tutulduğu kimi, Yerevan Bakıya "sülh müqaviləsi" adlı hansısa şərti sənəd təklif edir ki, bu sənəddə ümumi ifadələr və formular toplusu var və onlar müxtəlif cür şərh oluna bilər. Sülh müqaviləsinin bu rahat imitasiyası sonradan Azərbaycanı onu pozmaqda ittiham etmək və son vaxtların bütün razılaşmalarını ləğv etmək üçün lazımdır. Aralıq dövrdə vaxtı uzatmaq və dəyişmiş geosiyasi şəraitdə Bakı ilə yeni qarşıdurmaya hazırlaşmaq olar. Yenə də hesablamalar Azərbaycanın Rusiya və İran ilə maraqlarının toqquşmasına,  Fransa, Hindistan, ABŞ-dakı ermənipərəst konqresmenlərin dəstəyinə hesablanır”, - azərbaycanlı politoloq şərh edir.

Vəlizadə Paşinyanın xoş niyyətinə inanmır və hesab edir ki, bu şəraitdə müdafiə qabiliyyətini gücləndirməyə davam etməkdən, qoşunların istənilən mümkün hərbi təxribata hazırlıq səviyyəsini artırmaqdan başqa heç nə qalmır. “Belə vəziyyətdə yeni müharibəyə hazırlıq qaçılmaz olur”. –0—