İsa Qəmbər: Bu, növbəti cinayətdir

Müsavat Partiyası cümə axşamı öz ofisində Gənclər Təşkilatının üzvləri Sirac və Fərəc Kərimli qardaşlarının həbsilə bağlı mətbuat konfransı keçirib. 

“Bu həbs siyasi sifarişdir, növbəti cinayətdir, bir ailəyə qarşı qəddarlıqdır”, - deyə Müsavat Partiyası başqanı İsa Qəmbər təşkilat üzvü F.Kərimlinin saxlanmasına münasibət bildirib.

F.Kərimlinin iki gün öncəki həbsindən bir həftə əvvəl qardaşı S.Kərimli həbs olunub. Ona qarşı narkotik satışı, istifadəsi  kimi ittiham irəli sürülüb.Oğlunun həbsindən sonra S.Kərimlinin anası insult keçirib.

F.Kərimov iyulun 22-də anasını xəstəxanaya yerləşdirdiyi zaman naməlum şəxslər onu saxlayaraq naməlum istiqamətə aparıblar. “Bu, iqtidarın gəncliyə qarşı cinayətidir, gəncləri qorxutmaq, susdurmaq cəhdidir”, - deyə Müsavat lideri bu həbsə mövqe ifadə edib. Eyni zamanda, bu həbs sosial şəbəkələrdə fəal anti-iqtidar mövqeyi ortaya qoyan şəxlərə qarşı təzyiq kimi dəyərləndirilib.Bununla yanaşı, bu həbs Müsavat Partiyasına və bütünlükdə demokratik qüvvələrə qarşı basqı kimi dəyərləndirilib. Mətbuat konfransının gedişində Müsavat Partiyasının başqanı İ.Qəmbər partiyanın Tərtər təşkilatının keçmiş sədri Xaqani Məmmədovun da saxlanması haqda xəbər aldığını nəzərə çatdırıb. Bu həbsləri önləmək üçün təcili addımlar atılması təklifi verib.

“Bu iqtidar ölkədə həqiqəti yazan bir qəzet, sayt, QHT olmasını istəmir, bütün medianın iqtidardan asılı olmasını istəyir, bu iqtidar gerçək müxalifət qüvvələri istəmir, oyuncaq müxalifət istəyir”, deyə iqtidarın niyyətini açaraq, buna tabe olmayacaqlarını söyləyib.

Müsavat başqanı iqtiqarın ölkə vətəndaşlarından “Heydər Əliyev dəyərləri ilə yaşamaq” tələbinə də aydınlıq gətirib. “H.Əliyevdə hakimiyyət hərisliyindən, qisasdan başqa hansı dəyər var idi ki, biz bilmədik?”, deyə İ.Qəmbər mövqeyini açıqlayıb. İ.Qəmbər ölkənin nicatının H.Əliyev yolunda yox, ölkənin milli demokratik qüvvələrinin getdiyi ədalət, azadlıq, ləyaqət yolunda olduğunu bəyan edib.

Vəkil Nemət Kərimli bütün səylərinə baxmayaraq, indiyə kimi F.Kərmilinin harada saxlanmasını müəyyən edə bilmədiklərini söyləyib. N.Kərmili F.Kərmilinin həbsini qanunsuzluq, absurd adlandırıb.

S. və F.Kərimlilərin atası Raqif Kərimli ailəsinə qarşı bu hücumları ədalətsizlik, siyasi sifariş adlandırıb. Gəncləri mübarizə yolundan qorxudaraq geri çəkmək səyi adlandırıb. Amma bunun mükün olmayacağını bildirib. İctimai-siyasi həyata yeni nəsillərin gəldiyini deyən R.Kərimli bütöv bir nəsli qorxutmağın mümkünsüz olduğunu iqtidara xatırladıb.

Daha sonra F.Kərimlinin hüquqlarının müdafiəsilə bağlı Müdafiə Komitəsi təsis edilib və Müsavat Partiyası gənclər təşkilatının sədri Əhliman Abbaslı komitənin sədri seçilib. -05C-