Jan Klod Minyonun bəyanatı ziddiyyətli fikirlər doğurub

Avropa Şurası Parlament Assambleyasının (AŞPA) rəhbəri Jan Klod Minyonun Bakıda söylədikləri ölkənin vətəndaş cəmiyyəti nümayəndələrinin reaksiyasına səbəb olub. 

Qeyd edək ki, Minyon jurnalistlərə müsahibəsində deyib ki, “Azərbaycanda inkişaf müşahidə olunur, bunu qeyd etməmək mümkün deyil”. Yoxsulluğun 50%-dən 6%-dək azalması onda təəssürat doğurub.

O həmçinin Avropa Şurasının meyarlarına cavab vermək üçün Azərbaycanda “güclü iradənin olduğunu” görüb. Eyni zamanda “demokratiya yolunda yeni addım atan bir ölkədən çox şey gözləmək olmaz” deyib.

“Bu bəyanat anlaşılmazlıq və bir çox sual doğurur” – Hüquqi Maarifləndirmə Cəmiyyətinin rəhbəri İntiqam Əliyev Turan-a bildirib.

Onun sözlərinə görə, eyni şeyləri Minyon vətəndaş cəmiyyəti nümayəndələri ilə qapalı görüşdə də söyləyib. İ.Əliyev məxfilik səbəbindən görüşün detallarını açıqlamayıb.

Lakin əgər Avropa Şurasında hesab edirlər ki, Azərbaycan fəallarının sərbəst toplaşma azadlığının təmin edilməsi, korrupsiyaya son qoyulması barədə tələbləri həddən artıq şişirdilibsə, Azərbaycanın AŞ üzvü olmasının mənası varmı?

İ.Əliyev hesab edir ki, Qərb siyasətçiləri Azərbaycanda insan hüquqlarının pozulması faktlarına konformizm  nümayiş etdirirlər. Bunu görəndə “Kürü diplomatiyası” hesabatının müəllifinə inanmağa başlayırsan.

Qərb siyasətçiləri arasında belə fikir var ki, Azərbaycan hakimiyyətinə həddindən artıq təzyiq əks təsir verə bilər və ölkə vaxtilə AŞ-dan xaric edilmiş Belarusun vəziyyətinə düşə bilər.

Lakin Əliyevə görə, “Azərbaycanda bəzi sahələrdə vəziyyət Belarusda olduğundan daha pisdir. “Azərbaycan hökuməti öz opponentlərini nəinki döyür, həbs edir, böhtan atır, o,  xalqdan oğurlanmış böyük vəsaitləri müxalifətin, jurnalistlərin, hüquq müdafiəçilərinin ələ alınmasına sərf edir. Həm də  yalnız özününküləri deyil, beynəlxalq təşkilatları, xarici diplomatları, deputatları, xarici hökumətlərin üzvlərini ələ almaq üçün edilir.

Avropa Şurasının “Kürü diplomatiyası” hesabatında  bu barədə ətraflı danışılır. Müəllimlərin, həkimlərin 150-200 avro maaş aldığı, kəndlərin çoxunda qaz, işıq və suyun olmadığı ölkədə hökumət “Eurovision” müsabiqəsinin təşkilinə Almaniya, İsveç, Norveçdən çox  vəsait xərcləyir. Luvr muzeyinin təmirinə, Meksikada Heydər Əliyev parkının açılışına və digər bu kimi tədbirlərə milyonlar sərf edir”, - İ.Əliyev bildirib.

Son illər Avropa Şurası da daxil olmaqla, beynəlxalq təşkilatlar bir sıra postsovet ölkələri hökumətlərinin həmin təşkilatların qarşısındakı öhdəliklərini yerinə yetirməmək istəyinə təslim olublar. “Uzun müddət siyasətə üstünlük verən beynəlxalq təşkilatlar ümid edirdilər ki onlar hökuməti islahatlara sövq edə biləcəklər. Lakin başa düşmədilər ki, bu cür hökumətlər islahatlara getmir”, - İ.Əliyev vurğulayıb. 

Lakin  “Respublika Alternativi” (REAL) vətəndaş hərəkatının icraçı katibi Natiq Cəfərlinin fikrincə, Minyonun Bakı tərəfə reveransı diplomatiyadır. Minyon açıq bəyanatları ilə qıcıqlandırmamağa üstünlük verən, lakin məxfi danışıqlar zamanı fəal təsir göstərən siyasətçilər kateqoriyasına daxildir.

Vətəndaş cəmiyyətinin fəalları ilə görüşdə Minyon işarə edib ki, Avropa Şurası AŞPA-nın yanvar sessiyasında demokratik islahatlarla bağlı tələbləri əks etdirən qətnamənin reallaşmasına nail olacaq. 

Azərbaycanın AŞ Nazirlər Komitəsində qarşıdakı sədrliyi ilə əlaqədar (may - noyabr 2014) Bakı demokratiya və insan hüquqları sahəsində ciddi addımlar atmalı olacaq.06B-