![Azərbaycan liberal partiyasinin lideri, professor Lalə Şövkətin azərbaycan xalq cümhuriyyətinin 95 illiyi münasibəti ilə azərbaycan xalqina təbriki](https://turan.az/resized/750/500/resize/media/2013/main/052800037717.jpg)
- Söz istəyirəm
- 28 May 2013, 11:59
- 39
Azərbaycan liberal partiyasinin lideri, professor Lalə Şövkətin azərbaycan xalq cümhuriyyətinin 95 illiyi münasibəti ilə azərbaycan xalqina təbriki
Əziz həmvətənlərim!
Sizi millətimizin ən dəyərli, tariximizin fövqələhəmiyyətə malik Azərbaycan Xalq Cümhuriyyətinin 95 illik yubileyi münasibəti ilə səmimi qəlbdən təbrik edirəm!
95 il bundan öncə böyük mütəfəkkirimiz Məhəmməd Əmin Rəsulzadə başda olmaqla Azərbaycan Xalq Cümhuriyyətinin yaradıcıları son dərəcə gərgin daxili və xarici-siyasi şəraitdə, yüksək intellekt və böyük vətənpərvərlik, qəti şəxsi cəsarət nümayiş etdirərək, bütün müsəlman dünyasında ilk demokratik respublika, hüquqi, dünyəvi dövlət qurmuş, millətimizin rifahı uğrunda çalışmış, torpaqlarımızın müdafiəsi üçün son imkanlarınadək əllərindən gələni etmiş və Azərbaycan xalqının sivil xalqlar arasında yer tutmasına mənəvi haqqı oduğunu əyani sübut etmişlər.
1920-ci ildə bolşevik işğalı nəticəsində Cümhuriyyət süqut etsə də, bu qısa zamanda Azərbaycan dövlətçiliyi üçün həddindən artıq işlər görmüş, milli ideologiyanın və milli hakimiyyətin bünövrəsini qoyub, dövlət sərhədləri müəyyən edib, xarici ölkələrlə diplomatik əlaqələr yaradıb, dövlət atributlarını qəbul edib, milli ordumuzu qurub və milli tariximizdə silinməz iz qoyub. Məhəmməd Əmin Rəsulzadə, Əlimərdan bəy Topçubaşev, Fətəli Xan Xoyski, Nəsib bəy Yusifbəyli, Ceyhun Hacıbəyli, Əhməd bəy Ağayev və AXC-nin digər quruducularının adları bizim tariximizə qızıl hərflərlə yazılaraq ürəyimizdə əbədi yaşayacaq. XX əsr milli tariximizdə Azərbaycan Xalq Cümhuriyyətinin banilərinin əsri kimi qalacaq.
Əziz soydaşlarım!
Bu gün millətimizin qarşısında böyük və mürəkkəb məqsəd və problemlər durur - müstəqilliyimizin möhkəmlənməsi, ərazi bütövlüyümüzün bərpası, hüquqi demokratik dövlətin qurulması, millətin tərəqqisi. Bunların hər biri bizdən ilk növbədə məsuliyyət və mübarizə tələb edir. Və bu mübarizədə hər birimizdən qərarlıq, ardıcıllıq və prinsipiallıq tələb olunur. Azərbaycanın indiki mürəkkəb ictimai-siyasi vəziyyətində heç bir vətəndaşın biganə qalmağa ixtiyarı yoxdur! Biz öz dövlətimizə, vətənimizə sahib çıxmalıyıq.
Bu əlamətdar gündə mən sizi bir daha təbrik edirəm. Arzu edirəm hər birimiz bu günü Milli məfkurəmiz yolunda həyatından keçmiş insanları vəfa ilə anaraq və bu Yolu gedən fədakarlara təşəkkür bildirərək qeyd edək. Bu, bir Millətin özünü dərk etməsi, Milli Ruhuna sədaqəti, tarixinə hörməti və ehtiramıdır.
Lalə ŞÖVKƏT
Bakı şəhəri, 27 May 2013-cü il
Söz istəyirəm
-
Gəncə şəhərində ünvanlı sosial yardımın təyinatı ilə bağlı yubanmalar yarandığı deyilir. Gəncə şəhərində yaşayan Hacıyev Vüqar Turana bildirib ki, artıq bir aydan çoxdur ki, ünvanlı dövət sosial yardım üçün Dövlət Sosial Müdafiə Fondunun Gəncə vahid əlaqələndirmə mərkəzinə müraciət etsə də, ona nə müsbət cavab, nə də imtina cavabı verilmir: "Əlaqəndirmə mərkəzinə zəng vurub soruşanda deyirlər ki, VEMTAS sistemi işləmir deyə, müraciətlərə baxılması və cavabların verilməsi mümkün deyil. Bir aydan çoxdur ki, Gəncədən müraciət edən adamlar konkret cavab ala bilmir".
-
Çin hökümətinin başlatdığı Bir yol, bir kəmər layihəsi Çinin müasir tarixinin əsas uğuruna çevrilib. Çin Xalq Respublikasının təşəbbüskarı olan layihəyə tərəfdaş ölkələrdəki fəaliyyəti yalnız ikitərəfli iqtisadi yüksəlişlə məhdudlaşmır, həmçinin Bir yol, bir kəmər-ə üzv olan dövlətlərdə Çinin xarici siyaəstinə dəstəkdir. Əlavə olaraq layihədə üzvlüyü olan ölkələr Çin üçün mühüm təbii resurs mənbəyidir. Azərbaycan da Çinin rəhbərlik etdiyi Bir yol, bir kəmər layihəsinin iştirakçılarından biri olaraq ikitərəfli münasibətlərin tərəqqisində mühüm rol oynayır. Belə ki, Rusiya-Ukrayna müharibəsinin başlanması ilə Rusiya ərazisinin Qərbə çıxışının bağlanmasından sonra Trans-Xəzər Beynəlxalq Nəqliyyat yolu Azərbaycanı əsas ticarət marşurut xətti edib. Həmçinin yaranan şərait qeyri-neft sektorun artırmaq və İkinci Qarabağ Müharibəsindən sonra xarici investisiyanın ölkəyə axınını planlaşdıran Azərbaycan üçün xeyirli nəticələnə bilər. Lakin, Çinlə münasibətlərdəki yalnış siyasət bir çox mənfi təsirlər də vəd edir.
-
İki il əvvəl Biləsuvar Rayon İcra Hakimiyyətinin və Əmək və Əhalinin Sosial Müdafiəsi Nazirliyinin nümayəndələri Birinci Qarabağ müharibəsinin qəhrəmanı, şəhid Şaiq Kəlbiyevin evinə gəliblər və hakimiyyətin bu ailə üçün yeni ev tikmək niyyətində olduğunu bildiriblər.
-
Dəyərli media mənsublarını, peşəkar və vicdanlı jurnalistləri məhbəsdən salamlayıram.
Rəy yaz