Jurnalistlər Əvəz Zeynallının dərhal azad edilməsini tələb edir

“Xural” qəzetinin baş redaktoru Əvəz Zeynallı barəsində cinayət işi siyasi motivlərlə saxtalaşdırılıb, istintaq qərəzli aparılıb, məhkəmə isə faktiki olaraq işi araşdırmayıb və hökm ittiham aktının surəti olub. Zeynallının işi üzrə öz araşdırmasını aparan Jurnalistlərin Preventiv Reaksiya Qrupu belə bir nəticəyə gəlib.

Qrupun Zeynallı barəsində məhkəmə proseslərinin yekunlarına dair hesabatı iyulun 11-də RATİ-nin ofisində keçirilən dəyirmi masada təqdim edilib.

Qrup üzvü Əfqan Muxtarlı qeyd edib ki, Ali Məhkəmədə Zeynallının kassasiya şikayətinə baxılması ərəfəsində onun həmkarları Zeynallıya bəraət verilməsi üçün səyləri gücləndirəcəklər.

Hakimiyyətə təzyiqi artırmaq, digər tərəfdən isə beynəlxalq təşkilatlarla işi fəallaşdırmaq lazımdır, deyən Muxtarlı Zeynallının azad edilməsi məsələsini Milli Şuranın gündəliyinə daxil etməyi təklif edib.

Vəkil Elçin Sadıqov qeyd edib ki, Avropa İnsan Hüquqları Məhkəməsinə artıq jurnalistin qanunsuz həbsi və ofisində və mənzilində axtarışlarla bağlı şikayət göndərilib. Ali Məhkəmə hökmü ləğv etməsə, Strasburqa işin mahiyyəti üzrə də şikayət gedəcək.

Araşdırmaçı-jurnalist Şahvələd Çobanoğlu hakimiyyəti müstəqil jurnalistikanı boğmaq cəhdlərinə son qoymağa çağırıb.

Turan informasiya agentliyinin direktoru Mehman Əliyev bildirib ki, müstəqil jurnalist araşdırması Zeynallının işinin siyasi motivli olduğunu təsdiq edib. Zeynallının həbsi sifarişi Prezident Administrasiyasından və onun rəhbəri Ramiz Mehdiyevdən gəlib. Zeynallı yüksək vəzifəli məmurların tənqidinə və ifşasına görə “siyasi intiqam” məqsədilə həbs edilib. Zeynallıya qarşı cinayət təqibinin məqsədi azad medianı susmağa məcbur etmək idi.

Əliyevin fikrincə, Milli Şuranın yaradılması seçkilərdən əvvəl yeni siyasi vəziyyətin formalaşmasına şərait yaradacaq ki, bu da insan hüquqları ilə bağlı problemlərin həlli üçün imkan yaradacaq.

Media Hüquqları İnstitutunun direktoru Rəşid Hacılı bildirib ki, hakimiyyət Zeynallını həbs etməklə bütünlükdə Azərbaycanda söz azadlığını təqib edir.

RATİ-nin direktoru Emin Hüseynov bildirib ki, hazırda ölkədə 60-dan çox siyasi məhbus var, onların arasında 2 hüquq müdafiəçisi və 7 jurnalist var. E.Hüseynov onların azadlığa buraxılması üçün demokratik ictimaiyyəti səylərini birləşdirməyə çağırıb.

Görüş zamanı həmçinin iyulun 22-də - Milli Mətbuat Günü Zeynallı və digər jurnalistlərin azad edilməsi tələbi ilə piket keçirmək təklifləri səslənib.

* Zeynallı 2011-ci ilin oktyabrında keçmiş deputat Gülər Əhmədovanın şikayəti əsasında həbs edilib. Əhmədova özü hazırda fırıldaqçılığa görə həbsdədir.

Martın 12-də Ağır Cinayətlərə dair İşlər üzrə Məhkəmə Zeynalovu Azərbaycan CM-in 311.3.3 (böyük məbləğdə rüşvət alma), 311.4 (hədələmə yolu ilə pul tələb etmə), 306 (məhkəmə qərarını icra etməmə) və 213.1-ci (böyük həcmdə vergi ödənişindən yayınma) maddələri ilə təqsirli bilib. Sonradan Bakı Apellyasiya Məhkəməsi bu hökmü qüvvədə saxlayıb. -16B/06-