Kreml Rusiya vətəndaş cəmiyyətini maliyyə dəstəyindən məhrum etmək istəyir

Rusiya hakimiyyəti USAİD-in bu ölkədə fəaliyyətini qadağan etməyi qərara alıb. RF XİN-in ABŞ-ın Beynəlxalq İnkişaf Agentliyinin fəaliyyətinin dayandırılması haqqında şərhində deyilir ki, “USAİD siyasi proseslərə təsir göstərməyə çalışıb, onun işi isə həmişə humanitar əməkdaşlığın inkişafına yardım məqsədinə uyğun olmayıb”.

“Söhbət qrant paylanması vasitəsilə siyasi proseslərə, o cümlədən müxtəlif səviyyəli seçkilərə və vətəndaş cəmiyyəti institutlarına təsir etmək cəhdlərindən gedir. USAİD-in Rusiyanın regionlarında, xüsusən Şimali Qafqazda fəallığı ciddi suallar doğururdu, bu barədə amerikalı həmkarlarımıza dəfələrlə xəbərdarlıq etmişik”, deyə XİN-in bəyanatında bildirilir.

“Rusiya XİN rəsmi olaraq Amerika tərəfə bu il oktyabrın 1-dən USAİD-in fəaliyyətinə son qoyulacağı barədə bildiriş verib”, deyə sənəddə qeyd edilir. RF XİN həmçinin qeyd edir ki, “Rusiya indi “yeni donorlar” sırasına daxildir və bütün beynəlxalq təşkilatlardan inkişaf üçün yardım alıcısı statusundan imtina edir”.

Ekspertlər qeyd edir ki, Moskvanın USAİD-lə işləmək istəməməsi Rusiyada seçkilərin ədalətliliyini şübhə altına alan bəzi QHT-ləri maliyyələşdirməsi ilə əlaqədardır.

USAİD 1961-ci ilin noyabrında yaradılıb və uzunmüddətli iqtisadi yardım layihələrinin həyata keçirilməsi ilə məşğuldur. Təşkilat Rusiyada 1992-ci ildən fəaliyyət göstərir. QHT-lər arasında Moskva Helsinki Qrupu, “Səs” və “Memorial” onun tərəfdaşlarıdır. -02D-