Kurt Tonq: «İqtisadiyyatda şəffaflıq üçün hər kəsin şərh etmək hüququ olmalıdır»

ABŞ dövlət katibinin iqtisadi və biznes məsələləri üzrə köməkçisinin məsul müavini Kurt Tonq aprelin 15-də ADA Universitetində tələbələrlə görüşündən sonra səfərinin yekunları ilə bağlı brifinq keçirib.

K.Tonq bildirib ki, Azərbaycan rəsmiləri, iş adamları ilə görüşüb və səfərdə məqsəd dünyada enerji qiymətlərinin düşməsindən sonra Azərbaycanda iqtisadiyyatın durumu, Azərbaycan hökuməti və rəsmilərinin bu durumda iş üslublarını öyrənməkdir. “Azərbaycana səfərimin məqsədi iki ölkə arasında əlaqələrin gücləndirilməsinə töhfə verməkdir. Həmçinin iki ölkənin özəl sektorlarında fəaliyyət göstərən şəxslərin əlaqələrinin inkişafına yardım etməkdir”, - o vurğulayıb.

K.Tonq deyib ki, həmçinin ABŞ-ın Azərbaycana nə kimi kömək edə biləcəyini öyrənib.

“İkigünlük səfərim zamanı görüşlərdə maliyyə sektoru, kənd təsərrüfatı, ticarətin inkişafı, korrupsiyaya qarşı mübarizə sahəsində müzakirələr apardıq. Bu məsələlərin çözülməsi Azərbaycan iqtisadiyyatının daha da inkişaf etməsinə kömək edə bilər. Səfərimin digər məqsədi o idi ki, Azərbaycanın daxili infrastrukturunun necə inkişaf etdiyini, qonşuları ilə nə kimi əlaqə qurduğunu tədqiq edim. Biz bu gün Ələt limanını müşahidə etdikdən sonra düşündük ki, bu kimi layihələr bölgədəki əlaqələri inkişaf etdirmək baxımından çox vacibdir. Başa düşürük ki, infrastruktur önəmlidir. Lakin digər proqramlar,  məsələn, yüksək texnologiyaların tətbiqi də eyni əhəmiyyətə malikdir. Düşünürəm ki, ABŞ şirkətləri Azərbaycanla birgə işləyərək bu sahənin inkişafına önəm verir və bu istiqamətdə işləməkdə maraqlıdır”, - K.Tonq bildirib.

Dövlət katibinin məsul müavini  “Amerikanın səsi”nin iqtisadiyyatın şəfaflaşdırlması və  Azərbaycanın Ümumdünya Ticarət Təşkilatına qəbulu ilə bağlı suallarınlın cavabında deyib ki, özəl sektorla dövlət sektoru arasında müəyyən bir ünsiyyət olmalıdır.

“Bu ünsiyyət nəticəsində şəffaflıq məqamları əksini tapmalıdır. Bu yaxınlarda Azərbaycan prezidenti İlham Əliyev Amerika Ticarət Palatasının nümayəndələri ilə görüşərək Azərbaycanda iqtisadi məsələləri müzakirə edib. Ümid edirəm ki, bu kimi görüşlər daha müntəzəm şəkildə  həyata keçiriləcək. Digər vacib məqam odur ki, iqtisadiyyat sahəsində  mövcud olan iqtisadi tənzimləyici mexanizmləri hər kəs anlamalıdır. Eyni zamanda bu tənzimləyici mexanizmləri hər kəsin şərh etmək hüququ olmalıdır. Bu, öz-özlüyündə şəffaflığın artmasına təkan verə bilər”, - o qeyd edib.

Onun fikrincə, Azərbaycanın ÜTT-yə daxil olması yaxşı fikirdir.

“Azərbaycan bu üzvlüklə böyük iqtisadi imkanlara malik ola bilər. Azərbaycan investisiya, biznes sahəsində də müəyyən imkanlar qazana bilər. Bu quruma üzv olmaqla Azərbaycanın həmçinin digər üzv ölkələrlə daha yaxşı əlaqələr qurmaq imkanı yaranacaq", -Tonq bildirib. –0--