Laçın qayıdıb

Bakı/ 01.12.20/Turan: 27 il yarım davam edən işğaldan sonra, nəhayət, Laçın Azərbaycanın tərkibinə qayıdıb.

Laçın 1992-ci il mayın 18-də Ermənistanda yerləşən keçmiş sovet qoşunlarının dəstəyi ilə ermənilər tərəfindən işğal edilib. Laçın ələ keçirildikdən sonra ermənilər şəhəri yandırıblar. Müharibəyə qədər bütünlükdə rayonun əhalisi 50 min nəfərə yaxın idi.

İşğaldan sonra ermənilər Laçını erməniləşdirməyə, kilsələr tikməyə, toponimikanı dəyişdirməyə başlayıblar.

Bu, ermənilərin yüz illərdir istifadə etdikləri və ərazilərin qədim erməni torpaqları olmasının dəlili kimi qələmə verdikləri ənənəvi metoddur.

Laçın rayon mərkəzi dəniz səviyyəsindən 900 metr yüksəklikdədir və strateji mövqeyə malikdir. Laçından Ermənistana, Dağlıq Qarabağa, aran Qarabağda İranla sərhədə və şimala - Kəlbəcərə yollar gedir.

Laçın iqtisadi və mədəni cəhətdən böyük əhəmiyyətə malikdir. Onun ərazisi 1890 kv km-dir. Bu, böyük içməli su, meşə və fauna ehtiyatları olan ənənəvi heyvandarlıq rayonudur.

Ermənistanla həmsərhəd olan Laçın rayonu hərbi cəhətdən də həddindən artıq böyük əhəmiyyətə malikdir. -02В-