Laçında, Ermənistanla sərhəddə keçid məntəqəsi olmalıdır - İ.Əliyev

Bakı/18.02.23/Turan: Üçtərəfli görüş “kifayət qədər konstruktiv” olub, bunu şənbə günü jurnalistlərə Münhendə Azərbaycan prezidenti İlham Əliyev Ermənistanın baş naziri Paşınyan və ABŞ dövlət katibi Entoni Blinkenlə üçtərəfli danışıqlardan sonra deyib.

Müzakirə olunan məsələlər arasında o, Azərbaycan və Ermənistan arasında gələcək sülh müqaviləsini və bu müqavilənin şərtlərini qeyd edib.

“Müqavilə beynəlxalq hüquq prinsipləri əsasında hazırlanmalıdır, orada Qarabağla bağlı hər hansı qeyd yolverilməzdir.

Üç gün əvvəl Ermənistan tərəfindən sülh sazişi ilə bağlı təkliflərimizə cavab almışıq və hazırda onlar öyrənilir. İlk baxışdan Ermənistanın mövqeyində irəliləyiş var, lakin bu, yetərli deyil”, - Əliyev bildirib.

“Bundan başqa, Laçın-Xankəndi yolunda vəziyyətə də toxunulub. Mən bildirdim ki, hər hansı blokadadan söhbət gedə bilməz. Dekabrın 12-dən etibarən bu yoldan hər iki istiqamətdə sülhməramlıların və Qırmızı Xaçın 2500-dən çox avtomobili  keçib.

Biz mədənlərimizin qanunsuz işlənməsinə son qoyulmasını tələb edirik və bu baş verənə qədər fəallarımız öz şərəfli missiyasını yerinə yetirməyə davam edəcəklər”, - Əliyev bildirib.

“Yaxşı olardı ki, Ermənistan və Azərbaycan tərəfləri öz keçid məntəqələrini yaratsınlar. Ermənistanla sərhəddə Laçında və Zəngəzur dəhlizinin hər iki tərəfində olmalıdır. Bunun zərurətindən əvvəl də danışmışdıq, lakin bu gün mən Blinkenin iştirakı ilə keçirilən görüşdə bunu rəsmən bəyan etmişəm və biz Ermənistan tərəfdən rəsmi cavab gözləyəcəyik. Bizim bu mövqeyimiz həm Avropada, həm də Amerikada məntiqli kimi qəbul edilir”, - Əliyev vurğulayıb. -02B-