Vaqner qrupunun Ukraynada itkisi 30 000 nəfərdir

Vaşinqton/18.02.23/Turan: Ağ Evin hesablamalarına görə, Putinin etibarlı adamı Yevgeni Priqojinin rəhbərlik etdiyi Vaqner qrupundan rusiyalı muzdlular Ukraynada 30 mindən çox adam itiriblər.

Onlardan təxminən 9000 nəfər savaşda həlak olub, cümə günü brifinqdə Milli Təhlükəsizlik Şurasının rəsmi nümayəndəsi Jon Kirbi bildirib.

Bu yaxınlarda Bayden administrasiyası Vaqner qrupunu rəsmi olaraq ciddi transmilli cinayətkar təşkilat kimi tanıyıb və bəzi sanksiyalar tətbiq edib.

Kirbinin sözlərinə görə, bu hərbləşdirilmiş təşkilat hələ də öz sıralarını mühakimə edilmiş cinayətkarların hesabına artırır. Məhz onlar Baxmut bölgəsindəki döyüşlərdə fəal iştirak edirlər.

"Heç bir təchizat, heç bir təşkilati idarəetmə yoxdur, sadəcə, onları döyüşə atıblar", - Kirbi deyib.

Gələn həftə prezident Jo Bayden Polşaya gedəcək və orada Ukraynaya "lazım olduğu qədər" dəstək veriləcəyini təsdiqləyəcək.

Həmçinin Bayden Bolqarıstan, Çexiya, Estoniya, Macarıstan, Latviya, Litva, Polşa, Rumıniya və Slovakiya liderlərilə görüşəcək. Görüşdə Bayden "ABŞ-ın bu ölkələrin təhlükəsizliyinə və transatlantik birliyə sarsılmaz dəstəyini təsdiqləyəcək", - Kirbi deyib.

“Bayden Ukraynaya qırıcı təyyarələr verməyə hazırdırmı?” sualının cavabında o deyib ki, bu, gələcəkdə nəzərdən keçirilə bilər: "Biz ukraynalıların ehtiyacları ilə bağlı onlarla daim əlaqə saxlayırıq". 0