London COP29-a qədər Azərbaycan və Ermənistan arasında sülh əldə olunacağına ümid edir

Bakıda keçiriləcək COP29 iyunun 12-də kral III Çarlzın ad günü münasibətilə keçirilən qəbulda Böyük Britaniya səfiri Fergus Oldun çıxışında toxunduğu əsas mövzu olub.

"Altı ay öncə COP29-un Bakıda keçiriləcəyi ilə bağlı razılaşma həm iqlim dəyişikliklərinə qarşı mübarizədə, həm də regiondakı sülhün bərqərar olması üçün müsbət siqnal idi. Ümid edirəm ki, həm Azərbaycan, həm də Ermənistan COP29-dan əvvəl davamlı sülh sazişinə nail olmaq üçün əlindən gələni etməyə davam edə bilərlər", deyə səfir bildirib.

O, Azərbaycan-Britaniya əməkdaşlığını səciyyələndirən beş Britaniya atalar sözünü misal çəkib. Bu atalar sözlərinin hər biri Britaniya şirkətinin dizaynına kömək etdiyi COP29 loqosunun bəzi elementlərini əhatə edir.

"Günəşə tərəf gedən kölgəni arxada qoyar", deyən səfir Azərbaycanın günəş və külək enerjisindən istifadə üçün əlverişli yerdə yerləşdiyini qeyd edib.

"El çalışar, yer sevinər. Yer barlanar, el sevinər". Bu atalar sözü kənd təsərrüfatının Azərbaycan iqtisadiyyatının və mədəniyətinin bir hissəsi olduğunu ifadə edir. Bununla əlaqədar olaraq, o, Britaniya səfirliyinin Lənkəran, Lerik, Masallı və Astarada sahibkarlar və gənc fermerlərlə layihələrini qeyd edib. Bu layihə iqlimə davamlı kənd təsərrüfatını təmin etmək üçün müasir texnika və texnologiyalardan istifadəni nəzərdə tutur.

"Su aydın olduqda dərinliyi bilinir". Səfir bu atalar sözünü COP29-un əsas mövzularından biri olacaq şəffaflıqla əlaqələndirib.

 "Elmsiz adam meyvəsiz ağac kimidir", bu atalar sözü biliklərin və təmiz gələcəyə keçidin vacibliyini səciyyələndirir.

 Warwick Universiteti və Azərbaycan Dövlət Neft və Sənaye Universiteti bərpa olunan enerji üzrə ikili magistr dərəcəsi proqramını işə salıb.

 "El bir olsa dağ oynadar yerindən" - bu atalar sözü transformasiyanı ifadə edir və Böyük Britaniya Bakıya COP29-u böyük nailiyyətə çevirməkdə kömək etməyə hazırdır. 

Qeyd edilən vəzifələrin həllində təkcə hökumətlər deyil, həm də özəl biznes, universitetlər, vətəndaş cəmiyyəti və mətbuat iştirak etməlidir, deyə o qeyd edib.

Öz növbəsində, Azərbaycanın energetika naziri Pərviz Şahbazov qeyd edib ki, Böyük Britaniya ilk vaxtlardan sərmayələri və enerji sektorunun inkişafına dəstəyi ilə Azərbaycanın inkişafında mühüm rol oynayan strateji tərəfdaşdır.

Azərbaycan və Böyük Britaniya uzun illərdir yüksək səviyyəli münasibətlərin strateji tərəfdaşlıq, qarşılıqlı etimad əsasında inkişafına və davamlı nailiyyətlərlə möhkəmlənməsinə nail olan dost ölkələrdir. Birləşmiş Krallıq 35.9 milyard dollardan çox sərmayə yatırımı ilə Azərbaycanda ən böyük xarici investordur. İnvestisiya və ticarət artmaqda davam edir, əməkdaşlıq dairəsi genişlənir. Bu ilin ilk üç ayında ticarət dövriyyəsi 16 faiz artıb.

Enerji əməkdaşlığı neft və qaz hasilatının davam etdirilməsini, tullantıların xeyli azaldılmasını nəzərdə tutur. "AÇG-də dərin laylardan qaz hasilatı, “Şahdəniz” və digər layihələrin timsalında BP hələ uzun illər Azərbaycanın neft-qaz yataqlarının işlənilməsinin uğurunu təmin edəcəkdir.

BP ilə strateji tərəfdaşlığımızın hazırda “yaşıl enerji”, dekarbonizasiya üzrə genişləndirilməsi məmnunluq doğurur. Yaxın vaxtlarda təməli qoyulacaq 240 MVt gücündə günəş elektrik stansiyası və “Səngəçal”ın sinerjisi COP29 ilində karbohidrogenlərlə “yaşıl enerji”nin vəhdətinin nümayişi olacaq", deyə Şahbazov qeyd edib.