Macarıstan Ədliyyə Nazirliyi: Ramil Səfərovun təhvil verilməsi beynəlxalq hüquq normalarına uyğundur

Rəsmi Bakı Ramil Səfərov məsələsində beynəlxalq hüququn norma və prinsiplərinə uyğun hərəkət edib. Bu açıqlamanı Macarıstanın Ədliyyə Nazirliyi verib.

Nazirlik Ermənistan vətəndaşı Quren Markaryanı qətl etdiyi üçün 2004-cü il fevralın 19-da Macarıstanda ömürlük həbsə məhkum edilən R.Səfərovun “Məhkum olunmuş şəxslərin verilməsi haqqında” Strasburq Konvensiyasına (1983-cü il) uyğun cəzasının qalan hissəsinin çəkilməsi üçün Azərbaycana təhvil verildiyini bildirir. 

Nazirlik Azərbaycan və Macarıstanın bu konvensiyaya qoşulduğunu xatırladır. Konvensiyada göstərilir ki, tərəflərdən birinin ərazisində məhkum edilən şəxs cəzasının qalan hissəsini çəkmək üçün konvensiyanın müddəalarına uyğun olaraq digər dövlətə verilə bilər. Bunun üçün məhkumun hökmü çıxaran ölkəyə və ya təhvil verilmək istədiyi ölkəyə arzusunu ifadə edə və təhvil verilə bilər. Səlahiyyətli orqanlar dövlətin qərarına uyğun hökmün icrasını davam etdirə, hökmü məhkəmə yolu ilə və ya inzibati qaydada dəyişə bilərlər.

Azərbaycan Ədliyyə Nazirliyi bildirir ki, R.Səfərov Azərbaycan tərəfə məhkum şəxslərin verilməsi haqqında konvensiyada göstərilən şərtlərə uyğun təhvil verilib. Konvensiyaya əsasən, hökmün icrası dövlət qanunvericiliyi ilə tənzimlənir, bu dövlət bütün zəruri qərarları qəbul etməkdə səlahiyyətlidir.

Macarıstan Ədliyyə Nazirliyi rəsmi Budapeştin adı çəkilən konvensiyaya uyğun şəkildə 2010-cu ildə 11, 2011-ci ildə 7, 2012-ci ildə 8 məhbusu digər ölkələrə təhvil verdiyini xatırladır. -05D-