Milli Şura yanacağın qiymətinin artırılmasını pisləyib

Demokratik Qüvvələrin Milli Şurası (DQMŞ) Azərbaycan hökumətinin dekabrın 3-dən benzin və dizel yanacağının qiymətinin artırılması haqqında qərarını qətiyyətlə pisləyib.

Milli Şuranın dekabrın 3-də qəbul edilmiş bəyanatında hökumətin qərarı “qanunsuz və ədalətsiz addım” kimi qiymətləndirilib.

“Tənzimlənən qiymətlər haqqında Qanun”un prinsiplərinə, eləcə də  öz  Əsasnaməsinin 3.15-ci maddəsinə zidd olaraq, Tarif Şurası iqtisadi-sosial cəhətdən əsaslandırılmadan,  bazarın tələbləri və əhalinin alıcılıq qabiliyyəti nəzərə alınmadan yeni qiymət artımına rəvac verib, deyə DQMŞ-nin bəyanatında bildirilir.

“Əhalinin yaşayış səviyyəsi, ailə büdcəsinin imkanları  ilə uyğunluq təşkil etməyən bu qərarın verilməsində hakimiyyət yenə də oliqarxların maraqlarını və şəffaflığı şübhə doğuran büdcənin inflyasiya hesabına doldurulması məqsədlərini  əsas tutub. Belə ki, rəsmi proqnozlara görə, yalnız bu artımla hökümət büdcəyə ən azı 270 milyon manat əlavə vəsait cəlb etməyi nəzərdə tutur. Hesablamalar göstərir ki, Aİ-92 markalı avtomobil benzinini istifadə edən hər sürücü yalnız gündəlik cari məqsədlər üçün idarə etdiyi maşının mühərrikinin gücündən asılı olaraq, ayda ən azı orta hesabla 32 manat, Aİ-95 benzinin istifadə edənlər isə ən azı 40 manat əlavə vəsait xərcləməli olacaqlar. Bu isə orta aylıq əmək haqqının 8-10 faizi qədər xərc artımı deməkdir. Digər hesablamalar göstərir ki, orta statistik azərbaycanlı indiyədək illik qazancının 19,8 faizini bu məqsədə xərcləyirdi, hazırkı qiymət bahalaşmasından sonra bu göstərici 22,9 faiz təşkil edəcək.

Tarif Şurası yaxın vaxtlarda şəhərdaxili, şəhərətrafı və qəsəbələrarası marşrutlarda sərnişin daşıma xidmətlərinin qiymətini də artıracaq. Ardınca  elektrik enerjisinin, təbii qazın, suyun pərakəndə satış tarifləri də bahalaşdırılacaq. Tarif bahalaşmasının bazarların qarşılıqlı təsiri  və alternativ bazarlarda qiymət artımı qanunu əsasında istehlak, xüsusilə də ərzaq bazarında qiymətlərin artımına və inflyasiya yaradıcı amillərin fəallaşmasına təsiri şübhəsizdir. Ona görə gələn il üçün 2 rəqəmli inflyasiya qaçılmazdır. Hazırkı qiymət artımının iqtisadı əsasları olmadığı üçün bu addım əhaliyə qarşı soyğunçuluq siyasətidir və onun nəticələri xalqın həyat səviyyəsinin daha da pisləşməsinə gətirib çıxaracaq. Əmək haqları, pensiyalar və sosial müavinətlərin indiki aşağı həddində Tarif Şurasının qiymət artımı ilə bağlı yeni qərarı ölkədə onsuz da ağır vəziyyətdə olan sosial durumu daha da ağırlaşdıracaq, xalqı, xüsusilə sosial cəhətdən zəif müdafiə olunan aztəminatlı ailələri kəskin şəkildə müflisləşdirəcək. Yanacağın qiymətinin artması kənd təsərrüfatından da yan keçməyəcək və yaxın gələcəkdə bu istiqamətdə yeni qiymət artımını qaçılmaz edəcək.   

Bütün bunları nəzərə alaraq Milli Şura  hakimiyyətdən qiymət bahalaşmasına və əhalinin yoxsullaşmasına gətirib çıxaran qərarlara son qoymağı və qiymət bahalaşmasının yaratdığı əlavə xərclərin ödənilməsi üçün sosial proqramları genişləndirməyi tələb edir”, deyə bəyanatda qeyd edilir. -06D-