Milli Şura gələcək taktikasını müəyyən edir

Demokratik Qüvvələrin Milli Şurasının (DQMŞ) sessiyasında dramaturq Rüstəm İbrahimbəyovun bu vəzifədən istefası məsələsi müzakirə olunur.

AXCP lideri Əli Kərimli İbrahimbəyovu fəxri sədr seçməyi təklif edib.

Lakin EL hərəkatının nümayəndəsi Eldəniz Quliyev həmsədrlər institutu təsis etməyi və İbrahimbəyovu həmsədrlərdən biri seçməyi təklif edib.

Öz növbəsində, bir sıra sessiya iştirakçıları qeyd edirlər ki, İbrahimbəyov özü rəhbər vəzifəsindən könüllü olaraq imtina edir. 

Paralel olaraq Milli Şuranın bundan sonraki təşkilati strukturu, strateji məqsədləri və taktiki vəzifələri məsələləri müzakirə olunur.

İştirakçılara “Demokratik Qüvvələrin Milli Şurasının fəaliyyətinin gücləndirilməsi üzrə tədbirlər haqqında” sənəd paylanıb.

Sənədin preambulasında xatırladılır ki, Milli Şura 2013-cü ilin iyun ayında yaradılıb və 9 oktyabr seçkilərində müxalifət düşərgəsindən vahid namizədlə iştirak edib.

Təşviqat kampaniyası müddətinin qısa olmasına baxmayaraq, Milli Şura məhdud imkanlardan səmərəli istifadə edib və vətəndaşların ümidlərini müəyyən dərəcədə bərpa edib.

Seçkilər ərəfəsində aparılmış sorğular və 9 oktyabr səsverməsi göstərib ki, iradəsini könüllü ifadə edən vətəndaşların böyük əksəriyyəti Milli Şuranın namizədinə səs verib.

Lakin Azərbaycanda azad, ədalətli, demokratik və şəffaf seçki şəraiti olmadığından,  səsvermənin nəticələri total şəkildə saxtalaşdırılıb və Mərkəzi Seçki Komissiyasının qərarı ilə hakimiyyət yenidən mənimsənilib.

Aktiv seçki kampaniyası dövründə Milli Şuranın artan nüfuzundan böyük maliyyə vasitələri, dövlətin inzibati resursları və zorakılıq aparatı ilə müdafiə olunan hakim rejimin seçkiləri açıq şəkildə saxtalaşdırmağa başladığı bir şəraitdə Milli Şuranın simasında birləşmiş müxalifət qüvvələri yalnız mənəvi qələbə əldə edə bilib. Bundan başqa, hakimiyyətə real alternativ olduğu sübuta yetirildi.

Bu isə sonrakı səmərəli mübarizə və Azərbaycanda demokratik quruluşun təşəkkülü uğrunda fəaliyyətdə ciddi nəticələr əldə etmək üçün zəmin yaradıb. 

Milli Şuranın ötən müddətdəki fəaliyyəti Azərbaycan cəmiyyətinin demokratik dəyişikliklərə hazır olduğunu göstərib və bu prosesdə  müxalifət qüvvələri ümummilli maraqları partiya maraqlarından üstün tutmağa qadir olduqlarını nümayiş etdiriblər. Bütün bunlar sonrakı mərhələdə də Milli Şuranın Azərbaycanda demokratik dəyişikliklər prosesində birləşdirici rol oynayacağına böyük ümidlər yaradır. İlk növbədə 2014 və 2015-ci illərdə keçiriləcək bələdiyyə və parlament seçkilərində.

Ölkənin ərazi bütövlüyünün bərpası, avrointeqrasiya üzrə mühüm addımlar, siyasi məhbuslar probleminin və sosial problemlərin həlli ilə bağlı ümidlər də Milli Şura ilə bağlıdır.

Nəhayət, Milli Şuranın məqsədi antidemokratik hakimiyyətin dəyişdirilməsi, demokratik seçkilər əsasında xalqın iradəsini əks etdirən hökumətin formalaşdırılmasıdır.

Sözügedən məqsədlərə nail olmaq üçün Milli Şura öz strukturunu və strateji xəttini təkmilləşdirir. Milli Şura komitələrinin fəallaşdırılması, kollektiv orqan kimi Məşvərət Şurasının formalaşdırılması nəzərdə tutulur.

Yaxın gələcək üçün məqsədlər kimi siyasi məhbusların azad edilməsi, demokratik seçkilər üçün şərait yaradılması, seçki islahatlarının keçirilməsi, paritet əsaslarla seçki komissiyalarının formalaşdırılması müəyyən edilib.

Həmçinin, konstitusiya islahatları, parlamentin səlahiyyətlərinin genişləndirilməsi, proporsional sistemin bərpası uğrunda mübarizə, mətbuat, ifadə, birləşmək, dini etiqad azadlıqlarının təmin edilməsi, vətəndaş fəallığının artırılması üçün sosial şəbəkələrdən səmərəli istifadə üzrə səylərin fəallaşdırılması nəzərdə tutulur.

Beynəlxalq demokratik ictimaiyyətlə əməkdaşlığın genişləndirilməsi, Aİ-nin “Şərq Tərəfdaşlığı” proqramının məqsədlərinin ardıcıl şəkildə həyata keçirilməsi ürə proqram işlənib hazırlanması nəzərdə tutulur.

Bununla yanaşı, Azərbaycan mühacir təşkilatlarının imkanlarından istifadə ilə saxta prezident seçkilərinə müsbət rəy vermiş beynəlxalq təşkilatların və müşahidə missiyalarının üzvlərinin, konkret ictimai xadimlərin ifşası prosesinin davam etdirilməsi vəzifəsi qoyulur.

Qarşıya qoyulmuş məqsədlərə nail olmaq üçün məsul şəxslər təyin edilməklə, konkret fəaliyyət planları işlənib hazırlanması nəzərdə tutulur.

Bu vəzifələrin həyata keçirilməsi üçün Milli Şuradan kənardakı bütün maraqlı şəxslər və qruplarla əlaqələr qurmaq nəzərdə tutulur.

Layihə ətrafında müzakirələr davam edir. Bəzi DQMŞ üzvləri cari fəaliyyətə rəhbərlik üçün Milli Şuranın İdarə Heyətini təsis etməyi təklif edirlər.

Sessiyada DQMŞ-nin 70-dən çox üzvü iştirak edir. -06D-