Müdafiə naziri erməniləri darmadağın ediləcəkləri ilə hədələyib

Müdafiə naziri Zakir Həsənov cəbhə bölgəsinə səfər edib. Məlumatı Müdafiə Nazirliyinin mətbuat xidməti yayıb.

Ön xətdə xidmət edən hərbçilərlə görüşündə nazir deyib ki, erməni tərəfi yenə də qeyri-konstruktiv mövqe tutur və Qarabağ münaqişəsinin uzanmasına çalışır.  “Ancaq  biz buna imkan verməməliyik və bu münaqişə tezliklə həllini tapmalıdır”, - o vurğulayıb.

“Cəbhə xəttində düşmənin təxribatları davam edir. Ancaq ordumuz bu təxribatların qarşısını qətiyyətlə alır və daha sərt cavab tədbirləri həyata keçiriləcək”, - nazir bildirib.

Rusiyanın Ermənistana  verdiyi “İsgəndər” raketlərinə toxunan Z.Həsənov deyib ki, Azərbaycan tərəfi Ermənistanın nümayiş etdirdiyi raketlərin taktiki-texniki xüsusiyyətləri barədə tam məlumatlıdır. Bu, bölgədəki hərbi balansı düşmənin xeyrinə dəyişməyib.

“Biz bütün istiqamətlərdə tam üstünlüyə nail olmuşuq. Düşmən tərəfinin istifadə edə biləcəyi bir neçə qurğuya cavab olaraq Silahlı Qüvvələrimiz sərəncamındakı minlərlə raketlərdən, döyüş vasitələrindən cavab verməklə həmin raketləri vura bilməyə və düşmənin istənilən məsafədəki bütün hərbi infrastrukturunu məhv etməyə qadirdir”, - nazir bildirib.

“Aprel döyüşləri qarşı tərəf üçün bir dərs olmalı idi. Lakin görünür onlar bu zərbədən nəticə çıxarmayıblar.  Düşmənin növbəti təxribatına veriləcək cavab daha dağıdıcı və sarsıdıcı olacaq, onu tam məhv edəcək", - Z.Həsənov vurğulayıb.-02D-