Münaqişəyə aparan atəş

Bakı/24.04.21/Turan: Aprelin 22-də Zəngilan rayonunda, Azərbaycanla Ermənistan sərhəddində xidmət çəkən Azərbaycan sərhədçiləri Ermənistan əsgərləri tərəfindən atəşə tutulub. Dövlət Sərhəd Xidmətinin mətbuat mərkəzindən qeyd olunub ki, Ermənistan tərəfində xidmət edən Rusiya sərhədçiləri təxribat törədən şəxslərin içkili olduğunu bildirib. Onların hadisəyə reaksiya verilməməsini xahişindən sonra Azərbaycan tərəfi cavab atəşi açılmayıb.

Eyni zamanda, həmin gün Qubadlı rayonunun Şurnuxu kəndi istiqamətində 30-40 avtomobildə dövlət sərhəddinə doğru hərəkət edən bir qrup şəxs erməni dilində Azərbaycan əleyhinə şüarlar səsləndiriblər.

Bu hadisələrdən sonra Dövlət Sərhəd Xidmətinin rəsmi olaraq bildirib ki, bu cür təxribat halları gələcəkdə bir daha təkrarlanacağı halda ən kəskin cavab tədbirləri görüləcək. Son zamanlar Ermənistan rəsmilərin açıqlamaları da kəskinləşib. Bütün bunlar Azərbaycanla Ermənistanın arasında yeni münaqişəyə gətirib çıxaracaqmı?

Aprelin 24-də Rusiya Müdafiə Nazirliyinin saytında qeyd olunub ki, Rusiya sülhməramlıları 27 müşahidə postunda monitorinq aparır və atəşkəs bütün təmas xətti boyu qorunur.

Milli Məclisin Beynəlxalq münasibətlər və parlamentlərarası əlaqələr komitəsinin üzvü Elman Nəsirov Turan-a bildirib ki, Zəngilanda baş vermiş insident Ermənistan ordusundakı məğlubiyyət hissinin ifadəsidir: «Xüsusilə də son zamanlar Ermənistan siyasi rəhbərliyinin və revanşist qüvvələrin ritorikası bir az kəskinləşib. Aprelin 18-də Nikol Paşinyanın 2020-ci ilin hesabatını verərkən səsləndirdiyi fikirlər bu qənaətə gəlməyə əsas verir. Həmin fikirlərlə tanış olanda elə təəssürat yaranır ki, sanki Paşinyan «Qarabağ Ermənistandır və nöqtə» cəfəng fikrini səsləndirdiyi zamana qayıdıb, sanki o kapitulyasiya aktını imzalamayıb və onun bu çıxışı ötən ilin 27 sentyabra qədərki çıxışlarına bənzəyir».

Deputat hesab edir ki, Nikol Paşinyanın bu çıxışı iyunun 20-də Ermənistanda keçiriləcək növbədənkənar parlament seçkiləri ilə bağlıdır: «Hər iki cəbhənin nitqləri daha çox daxili auditoriyaya ünvanlanır».

Elman Nəsirovun fikrincə, darmadağın olunmuş Ermənistan ordusunun qalıqları psixoloji gərginlik keçirirlər: «Onlar depressiyadadılar və yeyib-içmək məclisini düzəldib ağır məğlubiyyətin təsiri altında Azərbaycan istiqamətinə baxıb atəşkəs rejimini pozmağa cəhd göstəriblər».

Komitə üzvü vurğulayıb ki, Rusiya sərhədçilərinin xahişi ilə Azərbaycan tərəfi buna reaksiya verməyib: «Lakin Ermənistan tərəfi nəticə çıxartmayacağı təqdirdə, istənilən anda Azərbaycan tərəfinin bunun qarşısını almağa, antiterror əməliyyatını keçirməyə hüququ var. Artıq bir dəfə belə bir əməliyyat keçirilib və Ermənistan diversantları həbs edilib».

Təhlükəsizlik məsələləri üzrə ekspert İlham İsmayıl “Azadlıq” radiosuna bildirib ki, Ermənistanla Azərbaycan arasında münaqişə yarana bilər: «Vəziyyət kəskinləşəcək. Zəngilanda atışmaya gəlincə, zaman-zaman belə şeylər olacaq. Buna oxşar hadisə Şuşa postunda da baş vermişdi. Ermənilər içmişdilər və posts hücum etmişdilər. Hətta bu barədə Fransa qəzeti da yazmışdı».

Ekspert hesab edir ki, Azərbaycan rəsmi şəkildə Dağlıq Qarabağda baş verən hadisələrə münasibəti sərt şəkildə bildirə bilməyib: «Beş aydan çoxdur ki, müharibə qurtarıb, amma biz hələ də bu sərt mövqeni görmürük. Bayden dünən Ərdoğanla danışıb və bildirib ki, «erməni soyqırımı» sözünü işlədəcək. Bundan sonra vəziyyət bir az da mürəkkəbləşəcək və gərginləşəcək».

İlham İsmayılın fikrincə, beynəlxalq vəziyyət heç də Azərbaycan maraqlarına uyğun olmaya bilər: «Ona görə də biz 10 noyabr bəyanatından irəli gələn bütün məsələləri qabartmalıyıq və hücum diplomatiyasına keçməliyik. Tələb etməliyik ki, bəyanatın bəndlərinə uyğun erməni silahlı birləşmələri Dağlıq Qarabağdan çıxarılsın. Çünki onlar hələ də çıxmayıblar, əksinə silahlanırlar, istehkamlar qazırlar».

Ekspert deyir ki, Azərbaycandan məcburi köçkünlər Dağlıq Qarabağa qayıtmır və bu, problem yaradır: «Elə buna görə Dağlıq Qarabağın statusu haqqında söhbətlər erməni rəsmilərin dilindən düşmür. Onlar fəaliyyətdədirlər, biz isə hələ də sakit dayanmışıq. Biz qəti qərarları qəbul etməliyik və sərt mövqeyimizi ortalığa qoymalıyıq».—0—